काठमाडौं । बाँकेको कोहलपुरमा सञ्चालित तेस्रो मुख्यमन्त्री कोहलपुर गोल्डकप फुटबल प्रतियोगिताको उपाधि राइजिङ स्टार फुटबल क्लबले जितेको छ ।

शनिबार भएको फाइनल खेलमा राइजिङ स्टारले आयोजक कोहलपुर रेसिङ साहारा क्लबलाई २–० ले हराउँदै उपाधि जितेको हो । कोहलपुर–२ स्थित तेह्र विगाह खेल मैदानमा सम्पन्न खेलको पहिलो हाफ गोलरहित बराबरीमा सकिएको थियो । दोस्रो हाफमा लगातार दुई गोल गर्दै पाहुना टोलीले पहिलोपटक उपाधि जितेको हो ।

दोस्रो हाफको पहिलो मिनेटमै राइजिङका कप्तान विनोद केवटले गोल गरेर टोलीलाई अग्रता दिलाएका थिए । लगत्तै दुई मिनेटको अन्तरमा व्यक्तिगत दोस्रो गोल गर्दै उनले राइजिङको उपाधि पक्का गरेका थिए । राइजिङका कप्तान विनोद केवटनै खेलको म्यान अफ द म्याच घोषित भए ।

उपाधिसहित राइजिङले ट्रफी, नगद आठ लाख रुपैयाँ प्राप्त गरेको छ । विजेता टोलीलाई कोहलपुर नगरपालिकाका प्रमुख पूर्णप्रसाद आचार्यले पुरस्कार प्रदान गरेका थिए । उपविजेता बनेको कोहलपुर रेसिङ साहारा क्लबले भने चार लाख रूपैयाँ प्राप्त गरेको छ ।

विधागततर्फ सर्वोत्कृष्ट खेलाडीको अवार्ड आयोजक रेसिङ साहारा क्लबका विनोद केसीले जिते । उनले ट्रफीसहित ५१ हजार प्राप्त गरे । राइजिङ स्टारका चेतन थारू वेष्ट डिफेन्डर, प्रतिक सुनार उत्कृष्ट गोलकिपर, सन्दीप केसी उत्कृष्ट प्रशिक्षकको अवार्ड हात पारे ।

विधागततर्फ उत्कृष्ट बनेका उनीहरूले नगद १० हजार रुपैयाँ प्राप्त गरे । राइजिङ स्टारका विनोद केवट र काँक्रेविहार फुटबल क्लबका धनसिंह विक सर्वाधिक गोलकर्ता हुँदै नगद पाँच–पाँच हजार प्राप्त गरे ।

कोहलपुर रेसिङ साहारा क्लबको आयोजनामा फागुन १७ गतेदेखि सञ्चालन भएको प्रतियोगितामा घाना र भारतीय क्लबसहित आठ टिमको सहभागिता रहेको प्रतियोगिता संयोजक कर्ण बस्नेतले बताए ।