काठमाडौं । संवैधानिक निकायमा ‘असंवैधानिक’ नियुक्ति भएको भन्दै ५२ पदाधिकारीविरुद्ध परेको रिट हेर्दाहेर्दैमा परेको छ । 

प्रधानन्यायाधीश प्रकाशमानसिंह राउत तथा न्यायाधीशहरू सपना प्रधान मल्ल, डा. मनोजकुमार शर्मा, डा. कुमार चुडाल र डा. नहकुल सुवेदी रहेको संवैधानिक इजलासले चैत ६ गतेका लागि पेसी तोकेको छ । गत माग ३० गतेदेखि नै संवैधानिक इजलासले हेर्दाहेर्दैमा राखेर सुनुवाइ अघि बढाएको हो ।

वर्तमान प्रधानमन्त्री केपी शर्मा ओलीको तत्कालीन नेकपा सरकारले संविधानको व्यवस्था नै संशोधन हुने गरी संवैधानिक परिषद्सम्बन्धी अध्यादेश जारी गरेर नियुक्ति सिफारिस गरेका थिए । उक्त निर्णयविरुद्ध अधिवक्ता ओमप्रकाश अर्याल, वरिष्ठ अधिवक्ता दिनेश त्रिपाठीसहितले दायर गरेको रिटमा चार वर्षपछि सुनुवाइ अघि बढेको हो ।

सर्वोच्चका तत्कालीन प्रधानन्यायाधीश चोलेन्द्रशमशेर जवराले नियुक्तिमा भाग लिएका कारण रिटमाथिको सुनुवाइमा अवरोध सृजना भएको थियो । उनीपछि कामु प्रधानन्यायाधीशमा दीपकुमार कार्की आएपछि संवैधानिक इजलास गठन गरी सुनुवाइ थालिए पनि निष्कर्ष प्राप्त नहुँदा रिट अल्झिएको थियो ।