काठमाडौं । चलचित्र ‘जनै हराएको बाहुन’मा केकी अधिकारी र मिरुना मगर अनुबन्धित भएका छन् । विजय बराल यसअघि नै अनुबन्ध भइसकेको चलचित्रमा केकी र मिरुनाको प्रवेश भएको हो । 

‘जनै हराएको बाहुन’ आगामी वर्षको हरितालिका तिज अर्थात् भदौ १० गते रिलिज हुँदै छ । 

चलचित्रको थिम मोसन पोस्टरमार्फत सार्वजनिक भइसकेको छ । ‘जनै हराएको बाहुन’ले आमा र छोराबीचको ‘इमोस्नल’ कथा भन्नेछ । 

‘जनै हराएको बाहुन’लाई हिमाल न्यौपानेले निर्देशन गर्नेछन् । उनको यो डेव्यु निर्देशन छन् । यो चलचित्रको असोसियट निर्देशक ‘प्रेमगीत ३’ अभिनेता मनिष राउत छन् । 

पेपरक्लिप प्रालिले निर्माण गर्न लागेको नयाँ कथा र आकर्षक सिनेमाको कथा, पटकथा र संवाद भानुभक्त ढकालले लेखेका छन् । चलचित्रले गाउँबाट सहर आएको एक सामान्य व्यक्तिले भोग्नुपरेका अनपेक्षित परिस्थिति र त्यसले जीवनमा ल्याएको परिवर्तनको कथालाई देखाउनेछ ।

चलचित्रमा नवीन गुरुङ छायांकार, क्रियटिभ निर्देशक सम्राट महर्जन (ज्याक), भीएफक्स सुपरभाइजरको रुपमा मयंक निरौला छन् ।

यो वर्षको अन्त्यसम्ममा चलचित्र छायांकनमा जाने निर्माणपक्षको प्रेस नोटमा उल्लेख छ । २०८२ सालमा दर्शकमाझ आउने चलचित्रको केही कलाकारका लागि अडिसन आह्वान गरेको छ ।