काठमाडौं । पोप फ्रान्सिसको स्वास्थ्य अवस्था गम्भीर बनेको छ । भ्याटिकन सिटीले आइतबार एक विज्ञप्ति जारी गर्दै पोपलाई अझै अक्सिजन थेरापी दिइरहेको जनाएको छ ।

भ्याटिकनको विज्ञप्तिअनुसार, रगत परीक्षणमा पोपमा प्रारम्भिक र हल्का मुटुको समस्या पनि देखिएको छ । मिर्गौलासम्बन्धी समस्या समेत देखिएको छ ।

उनको रगतमा प्लेटलेट्सको मात्रा उल्लेख्य रूपमा कम भएको देखिएको भ्याटिकनले जनाएको छ ।

यसअघि, आइतबार बिहान पोपले एक विज्ञप्ति जारी गर्दै क्याथोलिक इसाईहरूलाई परम्परागत प्रार्थना गर्न आग्रह गरेका थिए । किनभने, उनी आफैँ प्रार्थना गर्न असमर्थ थिए ।

धेरै दिनदेखि श्वासप्रश्वासमा समस्या भएपछि पोपलाई फेब्रुअरी १४ मा रोमको जेमेली अस्पतालमा भर्ना गरिएको थियो । अस्पतालमा पहिला उनको ब्रोन्काइटिसको उपचार गरिएको थियो । पछि उनी निमोनियाबाट पीडित भएको पाइयो ।

अर्जेन्टिनाका पोप फ्रान्सिस रोमन क्याथोलिक चर्चको नेतृत्व गर्ने पहिलो ल्याटिन अमेरिकी र पहिलो जेसुइट हुन् । बीबीसीबाट ।