काठमाडौं । पाकिस्तानी गजलगायक गुलाम अली गीत गाउन नेपालमा आउने भएका छन् । चैत २ गते ललितपुरको पुल्चोकस्थित प्लाजामा तीन घण्टा ‘गुलाम अली थ्री जेनेरेसन अन वन स्टेज’ कार्यक्रममा उनले गजल गाउनेछन् । 

आयोजक साधना कला केन्द्रका अनुसार सीमित टिकट मात्रै राखिएको छ । साधना कला केन्द्रका सञ्चालक मिलन मोक्तानका अनुसार फागुन २९ गते गुलाम अलीसहित ११ जनाको टिम नेपाल आइपुग्नेछ । उनले ‘गाजलु ती ठूला ठूला आँखा’लगायत चार नेपाली गीतसहित दर्जनौं हिन्दी गीत गाउनेछन् । 

आयोजक मोक्तानको टिमले पहिलोपटक गुलाम अलीको तीन पुस्तालाई एउटै मञ्चमा उर्तान लागेको बताए । गुलाम अलीसँगै उनका छोरा अमिर गुलाम अली र नाती नाजिर गुलाम अलीले पनि गीत गाउनेछन् । 

मिलन मोक्तानले गुलाम अलीको कार्यक्रममा टिकटबाट संकलित रकमको केही प्रतिशत रकम गायन र नृत्यमा बालबालिकालाई एक वर्षको छात्रवृत्ति समेत प्रदान गरिने बताए । 

कार्यक्रमको टिकट व्यवस्थापन इसेवाले गर्नेछ । टिकट मूल्य पाँच हजारदेखि दुई लाखसम्म राखिएको छ । बढीमा एक हजारवटा टिकट बिक्री गर्ने मिलनले जानकारी दिए ।

“टिकट पाँच हजारदेखि सुरु हुन्छ । पाँच हजार, दश हजार र १५ हजारको टिकट छ,” उनी बाह्रखरीसँग भन्छन्, “यसबाहेक एक लाख र दुई लाख रुपैयाँको टिकट पनि छ । दुई लाखको टिकटमा फ्रन्टमा ८ वटा सिटको टेबल छ । यो भीभीआईपीका लागि हो ।” 

एक लाखको टिकटमा टेबलसहित ६ वटा सिट रहेको उनले जानकारी दिए । फाइभस्टारको डिनर र वेलकम ड्रिंक्स पनि रहेको आयोजक मिलनको भनाइ छ । 

सोही कार्यक्रममा बरिष्ठ गीतकार तथा संगीतकार दीपक जंगमलाई विशेष सम्मान गरिनेछ । जंगमले गुलाम अलीका चार गीतमा शब्दरचना तथा संगीत दिएका छन् ।