काठमाडौं । मधेस सरकारको गृह, सञ्चार तथा कानुन मन्त्रालयले सिरहाका रिंकु सदा मृत्यु प्रकरणको अनुसन्धान गर्न गठित छानबिन समितिको प्रगति विवरण सार्वजनिक गरेको छ । गृह, सञ्चार तथा कानुनमन्त्री राजकुमार लेखीले पत्रकार सम्मेलनमार्फत उक्त विवरण सार्वजनिक गरेका हुन् ।

मन्त्री लेखीले सार्वजनिक गरेको विवरणानुसार, सिरहाको नवराजपुर गाउँपालिका–१, भगवतीपुर तामासुइया टोलकी १७ वर्षीया किशोरी रिंकुकुमारी सदाको मृत्यु प्रकरणमा पूरक जाहेरी परेको छ ।

स्थानीय युवक रुपेश मण्डलविरुद्ध यसअघि आत्महत्या दुरुत्साहनको जाहेरी दिइएको थियो । हाल परिवारले थप व्यक्तिहरूलाई प्रतिवादी बनाउँदै बलात्कारको कसुरमा अनुसन्धान गर्नुपर्ने मागसहित पूरक जाहेरी दर्ता गराएको छ । अनुसन्धान प्रक्रिया जारी छ ।

रिंकुकुमारी गएको माघ ३० गते बेलुका ७ बजेतिर आफ्नै घरमा झुन्डिएको अवस्थामा मृत फेला परेकी थिइन् । न्युज एजेन्सी नेपाल