काठमाडौं । बाराको कलैया उपमहानगरपालिका–१, बैंकरोडस्थित नवजन्म सुधार केन्द्रमा मृत भेटिएका धीरेन्द्र भनिने प्रदीपप्रसाद मण्डलको हत्या भएको प्रहरीको प्रारम्भिक अनुसन्धानबाट खुलेको छ । कलैया–९, रामपुरका ३२ वर्षीय मण्डलको शव शुक्रबार (फागुन २) बिहान फेला परेको हो ।

घटना शंकास्पद देखिएपछि प्रहरीले सुधार केन्द्रका सञ्चालकसहित सातजनालाई पक्राउ गरेर अनुसन्धान थालेको छ । हत्या भएको प्रारम्भिक अनुसन्धानबाट खुलेको जिल्ला प्रहरी कार्यालय बाराका प्रमुख एवं एसपी सन्तोष तामाङले बताए ।

“लागुऔषध दुर्व्यसनी राख्ने सुधार केन्द्रमा परिवारले राखेका मण्डलमाथि त्यहीँका अन्य व्यक्तिहरूले कुटपिट गरेको देखिन्छ,” उनले बाह्रखरीसित भने, “सोही कारण उनको ज्यान गएको हाम्रो प्रारम्भिक अनुसन्धानबाट देखिएको छ । थप पोस्टमार्टमबाट खुल्नेछ ।’’

घटना सुरुमै शंकास्पद लागेपछि एसपी तामाङकै नेतृत्वमा प्रहरी टोली सुधार केन्द्रमा पुगेको थियो । सुरुमा सञ्चालकसहित ६ जनालाई नियन्त्रणमा लिइएको थियो । प्रहरीले पछि थप एक गरी सातजनालाई पक्राउ गरेको छ । घटनामा संलग्न अरू दुईजना फरार रहेका उनले जानकारी दिए ।

• सुधार केन्द्रमा युवकको मृत्यु : ६ जना पक्राउ

पक्राउ पर्नेमा सुधार केन्द्रका सञ्चालकमध्येका कलैया–३ का १९ वर्षीय सर्फराज मन्सुर, कलैया–४ का २२ वर्षीय निरज सरार्फ छन् । यस्तै, कलैया–६ का २० वर्षीय महमद आशु मियाँ शेख, कलैया–१ का २४ वर्षीय अरुण शरार्फ, प्रमेश्वर साह, तमन्ना अली र सागर गुप्तालाई पनि प्रहरीले पक्राउ गरेको छ ।

सुरज शेख र साहिल अली फरार छन् । उनीहरूले कुटपिट गर्दा मण्डलको मृत्यु भएको खुलेको प्रहरीले जनाएको छ ।

प्रहरीका अनुसार, उनीहरूले मण्डलको मृत्युलाई भवितव्य देखाउन खोजेका थिए । सोही उद्देश्यले उनीहरूले सुधार केन्द्रमा जोडिएको सीसीटीभी क्यामेरा निकालेर फ्याँकेका थिए । तर, तत्काल आरोपित पक्राउसँगै प्रहरी सीसीटीभी फुटेज समेत ‘रिकभर’ गर्न सफल भएको छ ।

पक्राउ परेकाहरूले मण्डललाई कुटपिट गर्दै गरेको दृश्य सीसीटीभी फुटेजमा देखिएको एसपी तामाङले बताए । मण्डल १९ दिनअघि उक्त सुधार केन्द्रमा भर्ना भएको खुलेको छ ।

आरोपितमाथि थप अनुसन्धान जारी छ ।

सीसीटीभी फुटेजको भिडियो हेर्नोस्–