काठमाडौं । १५ मिनेटका निम्ति स्थगित प्रतिनिधिसभा बैठकको कार्य अघि बढाइएको छ । मंगलबार (माघ २९) दोस्रो बैठक सुरु हुनासाथ सभामुख देवराज घिमिरेले प्रतिपक्षको मागका विषयमा छानबिन गरेर निष्कर्षमा पुग्ने बताए ।

“आजको बैठकमा यसअघि सभाबाट भएको निर्देशबमोजिम निष्कर्षमा पुर्‍याइने व्यहोरा जानकारी गराउँछु,” उनले भने ।

बैठकमा विशेष समय चलिरहेको छ । आजकै यसअघिको बैठकमा सभामुखको आसनमा रहेकी उपसभामुख इन्दिरा रानामगरले शून्य समय सकिएर विशेष समय सुरु भइसकेपछि नेपाली कांग्रेसका सांसद रामहरि खतिवडालाई बोल्न समय दिएकी थिइन् । उनले बोलिसकेपछि राष्ट्रिय स्वतन्त्र पार्टी (रास्वपा)का सांसद गणेश पराजुलीले कुन नियमअन्तर्गत बोल्न दिइयो ? भन्दै आपत्ति जनाए । उनले खतिवडाको भनाइ रेकर्डबाट हटाउन माग गरे । त्यसपछि रास्वपा र नेकपा (माओवादी केन्द्र)का सांसदले आफ्नो आसनमा उभिएर विरोध गरे ।

माओवादी केन्द्रका प्रमुख सचेतक हितराज पाण्डेले बैठक नियमानुसार नचलेको भन्दै आपत्ति जनाए । प्रतिपक्ष सांसदले खतिवडाको भनाइ रेकर्डबाट हटाउन माग गरिरहे ।

त्यसपछि सभामुख देवराज घिमिरे के भएको हो अध्ययन गर्न संसद् सचिवालयलाई निर्देशन दिइएको भन्दै अघि बढ्न खोजेका थिए । तर, रास्वपाका सांसदले बोल्न समय मागेपछि उनले बैठक स्थगन गरेका थिए ।