काठमाडौं । चलचित्र ‘हरिबहादुरको जुत्ता’ले प्रदर्शन मिति तय गरेको छ । छायांकनमा रहेको चलचित्र दसैँको ‘फूलपाती’मा रिलिज हुने भएको छ । 

यो चलचित्रमा हरिवंश आचार्य र प्रकाश सपूत मुख्य भूमिकामा छन् । दीपेन्द्र के खनालले निर्देशन गरिरहेका छन् । 

“हरिबहादुर पनि जुत्ता फुकालेर यसपालिको दसैँ (फूलपाती)मा टीका लगाउन आउने भयो चलचित्र हरिबहादुरको जुत्ता” निर्देशक दीपेन्द्र फेसबुकमा लेख्छन् । 

‘हरिबहादुरको जुत्ता’ आउने भएसँगै यो दसैँमा रिलिजका लागि मिति तय गर्ने चलचित्रको संख्या आठ पुगेको छ । ‘परालको आगो’, ‘माइतीघर’, ‘१२ गाउँ–२’, ‘जारी–२’ ‘डबल ट्रिपल’, ‘महाराजधिराज’, , ‘माग्ने राजा’, ‘हरिबहादुरको जुत्ता’, ‘बलिदान’, ‘दशमी’ लगायत छन् । 

यी मध्ये ‘१२ गाउँ–२’ र ‘जारी–२’ र ‘बलिदान’ले भने औपचारिक रूपमा घोषणा गर्न बाँकी छ । 

‘१२ गाउँ’ रिलिज भइरहेका बेला बिराज भट्टले भने दसैँमा यसको सिक्वेल आउने घोषणा गरेका थिए । तर, ‘बलिदान’मा पनि समीर भट्ट नै हिरो रहेकाले बिराज पछि हट्ने सम्भावना छ । तर, ‘बलिदान’ दसैँमा आएन भने ‘१२ गाउँ–२’ले यो मिति नछोड्न सक्छ ।

दसैँमा चलचित्र रिलिज गर्ने तयारी रहेको यसबाहेकका अन्य केही निर्माता र निर्देशकले पनि बताइरहेका छन् । त्यसैले एक दर्जन सिनेमाले दसैँ रोज्दा को–को पछि हट्नुपर्ने हो त्यो भने यकिन छैन । 

केही निर्माता र निर्देशकले भने आफ्नो चलचित्रको हाइप बनाउन र ‘नोटिस’ गराउन पनि यसो गर्ने गरेको स्वयं चलचित्रकर्मीहरू नै बताउँछन् । 

वितरकले भने दुईवटाभन्दा धेरै चलचित्र रिलिज भए भने हलमा शो नपुग्ने बताउँदै आएका छन् । गएको दसैँमा तीनवटा नेपाली चलचित्र रिलिज भएका थिए । 

शो नपुग्दा चलचित्र राम्रो भए पनि अपेक्षित व्यापार गर्न नसक्ने वितरकको भनाइ छ ।