काठमाडौं । गोरखाको धार्चे गाउँपालिका–४, लाप्राकमा निर्माण गरिने ४.६ मेगावाट क्षमताको सुपर माछाखोला जलविद्युत् आयोजनामा राष्ट्रिय वाणिज्य बैंक लिमिटेडले लगानी गर्ने गरी ऋण सम्झौता भएको छ । उक्त आयोजनामा लगानीसम्बन्धी सम्झौतापत्रमा बूढीगण्डकी हाइड्रोपावरका तर्फबाट अध्यक्ष खगेन्द्र न्यौपाने र बैंकका प्रमुख कार्यकारी अधिकृत देवेन्द्ररमण खनालले हस्ताक्षर गरेका हुन् ।

कुल ९६ करोड ३८ लाख ३० हजार रुपैयाँ लागत अनुमान गरिएको आयोजनामा ७० प्रतिशत ऋण र ३० प्रतिशत स्वपुँजी लगानी हुनेछ । प्रवद्र्धक कम्पनीका अनुसार, ऋणतर्फ राष्ट्रिय वाणिज्य बैंकले ६७ करोड ४६ लाख ८० हजार रुपैयाँ लगानी गर्नेछ । बाँकी २८ करोड ९१ लाख ५० हजार रुपैयाँ स्वपुँजी लगानी हुनेछ ।

आयोजनाबाट वार्षिक २७.३७९ गिगावाट आवर विद्युत् उत्पादन हुनेछ । वर्षामा १८.६२१ गिगावाट आवर र हिउँदमा ८.७५ गिगावाट आवर बिजुली उत्पादन हुनेछ ।

यो समूहले यसअघि सोही क्षेत्रमा तोकिएको अवधिभन्दा ६ महिनाअघि ४.५५ मेगावाट क्षमताको विकास हाइड्रोपावर जलविद्युत् आयोजना निर्माण गरी सञ्चालनमा ल्याइसकेको छ ।

समूहले यो आयोजना आउँदो १८ महिनाभित्र सञ्चालनमा ल्याउने जनाएको छ । ०८० असार २१ गते नेपाल विद्युत् प्राधिकरणसँग आयोजनाको विद्युत् खरिद–बिक्रीसम्बन्धी सम्झौता भएको थियो ।