काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेविरुद्ध सहकारी ठगी प्रकरणमा चितवन जिल्ला अदालतमा बिहीबार दोस्रो दिनको थुनछेक बहस सुरु भएको छ । बुधबार (हिजो) न्यायाधीश दयाराम ढकालको इजलासले लामिछानेलाई आज बिहान १० बजे अदालतमा उपस्थित गराउने गरी न्यायिक हिरासतमा पठाएको थियो ।

लामिछानेविरुद्ध आज तीन जिल्ला न्यायाधिवक्ताले पनि बहस गर्ने चितवन अदालतका सूचना अधिकारी अमृत विश्वकर्माले जानकारी दिए । “अहिले छिमेकी जिल्लाबाट आउनुभएका जिल्ला न्यायाधिवक्ताहरू – बारा जिल्लाबाट शम्भुकुमार बस्नेत, पर्सा जिल्लाबाट भोलानाथ निरौला र धादिङ जिल्लाबाट दशरथ पंगेनी सरहरू क्रमशः बहस हुने क्रम जारी छ,” उनले बाह्रखरीसित भने ।

यस्तै, लामिछानेका तर्फबाट एक र पीडित पक्षबाट तीनजनाले बहस गर्नेछन् । बुधबार सरकारी वलिकका तर्फबाट पाँच र लामिछाने पक्षबाट एकजनाले बहस गरेका थिए । 

त्यसपछि लामिछानेलाई प्रहरी हिरासतमा पठाइएको थियो । गएको मंगलबार लामिछानेविरुद्ध जिल्ला सरकारी वकिल कार्यालयले सहकारी ठगीमा चितवन अदालतमा मुद्दा दायर भएको थियो ।

थुनछेक बहस सकिएपछि अदालतले लामिछानेलाई साधारण तारेख, धरौटीमा रिहा वा पुर्पक्षका निम्ति कारागार चलानमध्ये एक आदेश गर्नेछ ।