काठमाडौं । भारतीय नक्कली नोटसहित प्रहरीले एक युवकलाई पक्राउ गरेको छ । सर्लाहीको ईश्वरपुर नगरपालिका–१५, सुकनाहा बजारबाट उनलाई पक्राउ गरिएको प्रहरीले जनाएको छ ।

पक्राउ पर्नेमा भारतको सीतामढीका २७ वर्षीय मुकेशकुमार सोनी छन् । शनिबार साँझ (माघ १९) उनलाई पक्राउ गरिएको प्रहरी प्रधान कार्यालयले जानकारी गराएको छ ।

उनका साथबाट प्रहरीले भारतीय ५०० दरको एक र १०० का २९ थान नक्कली नोट बरामद गरेको छ । सुकनाहा बजारस्थित किराना पसलमा मुकेशले सामान किनेपश्चात् नक्कली नोट दिएको भन्ने सूचनापछि प्रहरी टोली खटिएको थियो ।

उक्त नक्कली नोट र उनले प्रयोग गरेको बीआर३०एई ३३९९ नम्बरको मोटरसाइकल समेत बरामद गरिएको प्रहरीले जनाएको छ ।