काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले आफ्नो पार्टीका पक्षमा ध्रुवीकरणको नयाँ लहर सुरु भएको बताएका छन् । शनिबार चितवनमा बृहत् पार्टी प्रवेश कार्यक्रममा उनले देशलाई माया र परिवर्तनलाई संस्थागत गर्ने अभियानमा ध्रुवीकरणको नयाँ लहर सुरु भएको बताएका हुन् ।

अध्यक्ष प्रचण्डले हाल देशभरि माओवादी पार्टी र यसको नेतृत्वका पक्षमा लहर देखिएको उल्लेख गरे । यसले आउँदो निर्वाचनमा माओवादी केन्द्र पहिलो पार्टी बन्ने आधार फराकिलो बन्दै गएको उनले बताए ।

आफूले १८ महिना सरकारमा रहेर नयाँ अभियानको थालनी गरेको उनले जिकिर गरे । त्यसबाट डराएकाहरूले सरकारबाट हटाएको जनताले प्रस्ट रूपमा बुझिसकेको उनको भनाइ थियो ।

उनले पार्टीका तर्फबाट पनि यसबीचमा भएका कमजोरीको आत्मसमीक्षा गर्दै रूपान्तरणको थालनी गरिएको बताए ।

आफूले छिटै संसद्‌मा सम्बोधन गर्ने र वर्तमान राजनीतिक घटनाक्रमका बारेमा देशलाई जानकारी गराउने उनले उल्लेख गरे ।

अध्यक्ष प्रचण्डले लामो समयदेखि राजनीतिक आन्दोलनमा संलग्न नेताहरूको प्रवेश र ध्रुवीकरणले माओवादी केन्द्रलाई बलियो बनाउने मात्र नभई मुलुककै अग्रगामी रूपान्तरणका निम्ति महत्त्वपूर्ण योगदान पुग्ने बताए । 

कार्यक्रममा उनले नेकपा (एकीकृत समाजवादी)का कृष्णराज न्यौपानेको नेतृत्वमा विभिन्न पार्टी परित्याग गरी माओवादी केन्द्रमा प्रवेश गर्ने नेता–कार्यकर्तालाई स्वागत गरेका थिए । हिमालयन टेली भ्वाइस