काठमाडौं । प्रधानमन्त्री केपी शर्मा ओलीले सरकारले हालै ल्याएको अध्यादेशका अन्तरवस्तुमा नभएर प्रक्रियामा प्रश्न उठाइएको बताएका छन् । सरकारले नागरिकको सेवा सुविधालाई केन्द्रमा राखेर अध्यादेश ल्याएको उनले जिकिर गरे ।

शुक्रबार प्रतिनिधिसभा बैठकमा उनले विशेष हुटहुटीले नेपाली कांग्रेस र नेकपा (एमाले) एक ठाउँमा भएको बताए । त्यसैले संसद्को अधिवेशन आउँछ, त्यसपछि काम गरौँला भनेर कुर्ने अवस्था नभएकाले अध्यादेश ल्याउनुपरेको उनको भनाइ थियो ।

“काम ढिलो भयो, समयमा उपलब्धि हासिल हुन सकेन भन्ने सार्वजनिक गुनासो सम्बोधनका लागि नै अध्यादेश ल्याइएको हो,” उनले भने, “सुधारको हुटहुटीले दुई ठूला दल एक ठाउँ आएका छौँ । संसद्को अधिवेशन आउँदै छ भनेर कुर्ने अवस्था नरहेकाले नै अध्यादेश ल्याउनुपरेको हो ।”

राजनीति दलहरूको लाभहानि नभएर नागरिकका सेवा सुविधाका विषय भएको भन्दै उनले त्यसलाई नै प्राथमिकतामा राखेर अध्यादेश जारी भएको बताए । “अहिले अध्यादेशका कन्टेन्टमा नभएर प्रक्रियामा मात्र प्रश्न उठिरहेको छ । प्रक्रिया विकासको बाधक बन्नु हुन्न,” प्रधानमन्त्री ओलीले भने, “संविधानले नै संसद् नचलेको बेला अध्यादेश ल्याउने व्यवस्था गरिदिएको छ, अहिले सरकारले त्यही गरेको होइन र ?”

अध्यादेश यहाँ पेस गरेसँगै अब संसद्को सम्पत्ति भएको भन्दै उनले त्यसलाई फिर्ता पठाउने वा पारित गरेर कार्यान्वयनमा लैजाने निर्णय गर्न आग्रह पनि गरे । “अध्यादेश पेस गरेसँगै अब संसद्को सम्पत्ति भएको छ,” उनले भने, “यसलाई अस्वीकार गर्ने वा छिटो पारित गरेर जनताको सुविधामा प्रयोग गर्ने अधिकार संसद्लाई रहेको छ ।”