सर्लाही । सर्लाहीको ईश्वरपुरमा प्लास्टिक उद्योगमा आगलागी भएको छ । शुक्रबार (माघ १८) बिहान भएको आगलागीबाट ईश्वरपुर नगरपालिका–७, ब्रह्मस्थानस्थित हिमालयन पोली नेपाल नामको प्लास्टिक झोला उद्योग नष्ट भएको हो । 

विद्युत् ‘सर्ट’ भएर एक्कासि लागेको आगोले उद्योग रहेको नेत्रबहादुर कार्कीको घर पूर्ण रूपमा नष्ट भएको छ । छिमेकी नवलकिशोर साहको घरमा आंशिक क्षति पुगेको जिल्ला प्रहरी कार्यालय सर्लाहीका प्रवक्ता एवं प्रहरी उपरीक्षक दीपक श्रेष्ठले जानकारी दिए ।

चन्द्रनगर गाउँपालिका–४, पोखरिया टोल निवासी रामछविला साहले कार्कीको घर भाडामा लिएर उद्योग सञ्चालन गरेका थिए । आगलागीबाट उद्योगका सम्पूर्ण उपकरण, तयारी सामग्री, कच्चापदार्थलगायत सामान नष्ट हुँदा सात करोड ५० लाख रुपैयाँ बढीको क्षति भएको सञ्चालक साहले दाबी गरे ।

नेपाल प्रहरी, सशस्त्र प्रहरी, स्थानीय, हरिवन र मलंगवा नगरपालिकाबाट पुगेको वारुणयन्त्रको सहयोगमा साढे दुई घण्टापछि आगो नियन्त्रणमा लिइएको थियो । घटनाबारे थप अनुसन्धान भइरहेको श्रेष्ठले जानकारी दिए ।

आगलागीबाट चार करोड रुपैयाँ बढीको क्षति भएको प्रहरीको अनुमान छ । तर, क्षति र घटनास्थलको मुचुल्का संकलनको कार्य भइरहेकाले यकिन विवरण आउन बाँकी रहेको उनले जानकारी दिए । रासस