काठमाडौं । काठमाडौंस्थित भारतीय राजदूतावासले भारतको ७६औँ गणतन्त्र दिवस मनाएको छ । लैनचौरस्थित दूतावास परिसरमा आयोजित समारोहमा नेपालका लागि भारतीय राजदूत नवीन श्रीवास्तवले भारतको राष्ट्रिय झन्डा झन्डोत्तोलन गरेर कार्यक्रमको शुभारम्भ गरेका थिए । त्यस क्रममा उनले नेपालमा रहेका प्रवासी भारतीयलाई पनि शुभकामना दिए ।

त्यसपछि कार्यक्रममा भारतकी राष्ट्रपति द्रौपदी मुर्मुले राष्ट्रका नाममा गरेको सम्बोधन प्रसारण गरिएको थियो । कार्यक्रममा प्रवासी भारतीयको ठूलो संख्यामा उपस्थिति थियो ।

राजदूत श्रीवास्तवले भारतीय सशस्त्र बलका मृतक सैनिकका श्रीमती र निकटतम नातेदारलाई पाँच करोड रुपैयाँ रकम वितरण गरेर सम्मान गरे । साथै, भारतीय सशस्त्र बलका २१९ जना मृतक सदस्यका श्रीमती र निकटतम नातेदारलाई २३ करोड २९ लाख रुपैयाँ रकम पनि वितरण गरिएको छ । यस भुक्तानीमा आर्मी ग्रुप इन्स्योरेन्स (एजीआई) कार्यक्रम अन्तर्गत वर्ष २०२४ का लागि डेथ–इन–सर्भिस, एक्सटेन्डेड इन्स्योरेन्स र एजीआई परिपक्वता भुक्तानीलगायत लाभ समावेश रहेको दूतावासले जनाएको छ ।

राजदूतले नेपालमा बसोबास गरिरहेका भूतपूर्व सैनिकका लागि भारत सरकारको कल्याणकारी पहलहरू समावेश गरिएको भूपू–२०२५ पत्रिकाको पनि लोकार्पण गरे । 

यसैगरी, दूतावासले नेपालका २९ शैक्षिक संस्थालाई २३ लाख ५० हजार रुपैयाँ बराबरका पुस्तक प्रदान गरेको छ ।

यसैगरी, ०८१ कात्तिक २६ गतेदेखि मंसिर २६ गतेसम्म आयोजित 'भारत को जानिए (बीकेजे) क्विज'मा नेपालका शीर्ष ५० स्कोररलाई 'सर्टिफिकेट्स अफ अचिभमेन्ट' प्रदान गरेर सम्मान गरिएको छ । पुरस्कारको अंशको रूपमा, विश्वभरका क्विजका शीर्ष ३० विजेतालाई यस महिनाको सुरुवातमा दुई हप्ते बीकेजे यात्राका लागि भारत आमन्त्रित गरिएको छ । विजेताहरूमध्ये नेपालका निखिल कुमार दास पनि थिए ।

कार्यक्रममा विगतका वर्षहरूमा भारत–नेपाल सम्बन्धमा भएको प्रगतिबारे विस्तृत जानकारी भिडियोमार्फत प्रस्तुत गरिएको थियो ।

कार्यक्रममा काठमाडौंको दूतावासस्थित स्वामी विवेकानन्द सांस्कृतिक केन्द्र र केन्द्रीय विद्यालयका विद्यार्थीहरूले सांस्कृतिक प्रस्तुति पनि प्रस्तुत गरेका थिए ।