दाङ । नेपाल कम्युनिस्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’ले आफ्ना नेता–कार्यकर्तालाई जनतासँगै खटिन निर्देशन दिएका छन् ।

माओवादी केन्द्र घोराहीको नगर अधिवेशन उद्घाटन तथा जिल्लास्तरीय पार्टी प्रशिक्षणलाई शनिबार घोराहीमा सम्बोधन गर्दै उनले विगतमा सत्तामा जाँदा सहिद, बेपत्ता तथा घाइते परिवारसँग सम्बन्ध टुटेको बताए । जनतासँग पनि सम्बन्ध पनि टुटेको उनले उल्लेख गरे ।

उनले विगतको गल्ती सच्याउन निर्देशन दिए । “विगतमा हामीमा धुलो लागेकै हो,” उनले भने, “अब हामी सच्चिनुपर्छ, सच्चिएर जनताको सेवामा लाग्नुपर्छ ।”

अहिले आफूले देशव्यापी रूपमा सहिद र बेपत्ताका परिवारसँग भेटघाट गरिरहेको तथा जनताको घरदैलोमा पुग्ने गरेको उनले बताए । उनले सबै नेता–कार्यकर्ता यसरी नै जनताका घरघरमा जान निर्देशन दिए ।

साथै, उनले प्राप्त उपलब्धिलाई रक्षा गर्नु अहिलेको आवश्यकता भएको बताए । उपलब्धिमाथि चौतर्फी प्रहार भइरहेको भन्दै उनले यसको रक्षाका निम्ति शान्तिपूर्ण आन्दोलन हुन सक्ने भन्दै त्यसका लागि तयार हुन समेत निर्देशन दिए । रासस