काठमाडौं । प्रधानमन्त्री केपी शर्मा ओलीले हल्लाका पछाडि नलाग्न आग्रह गरेका छन् । शुक्रबार बुटवल–गोरुसिंगे सडकखण्डको स्तरोन्नति कार्यको भर्चुअल माध्यमबाट शिलान्यास गर्दै प्रधानमन्त्री ओलीले हल्लाका पछाडि नभइ भविष्यउन्मुख भएर कामका पछाडि लाग्न आग्रह गरे । उनले लोकतान्त्रिक बाटोबाट नै विकास सम्भव रहेको उल्लेख गरे ।

विविधताहरूलाई राष्ट्रिय एकतामा परिणत गर्दै अघि बढ्न जरुरी रहेको प्रधानमन्त्री ओलीको भनाइ थियो । एकता नै राष्ट्र निर्माणको बलियो आधार भएको स्पष्ट पारे ।

प्रधानमन्त्री ओलीले भने, "म सम्पूर्ण नेपाली जनतालाई भन्न चाहन्छु, हल्लाका पछाडि होइन, कामका पछाडि सुन्दर भविष्यउन्मुख भएर हामी अघि बढौँ । लोकतान्त्रिक बाटो, यस बाटोलाई हामीले अगाडि लिएर जानुपर्दछ । यहाँ अस्थिरता बढ्न दिने, प्रतिगमन हुन दिने होइन । यहाँ जातजात, भूमि, भूमिका नाउँमा, भूगोल भूगोलका नाउँमा वा थर थरका नाउँदा, धर्म धर्मका नाउँमा अनेक प्रकारका विद्वेष फैल्याउन दिन होइन । हामी नेपालीहरू एकजुट भएर, एकतावद्ध भएर हाम्रा बीचका भिन्नताहरूलाई वा विविधताहरूलाई राष्ट्रिय एकतामा परिणत गर्दै हामी अगाडि बढ्नुपर्दछ । एकता नै राष्ट्र निर्माणको बलियो आधार हो । एकताबद्ध प्रयास नै मुख्य ग्यारेन्टी हो, हामीले देश निर्माण गर्नसक्छौँ भन्ने । हामी अघि बढिरहेका छौँ ।"

प्रधानमन्त्री ओलीले सम्पन्न भएका कामहरूप्रति खुसी प्रकट गर्दै छिटोभन्दा छिटो जनतालाई सेवा दिन पाइयोस् भन्ने सरकारको उद्देश्य रहेको बताए । सरकार स्थिरता, दृढ निश्चयका साथ विकास निर्माणका प्रयासमा अघि बढिरहेको बताए ।