काठमाडौं । प्यालेस्टिन चरमपन्थी समूह हमासले रिहा गर्ने बन्धकको सूची जारी गरेसँगै गाजामा युद्धविराम सुरु भएको छ ।

इजरायली प्रधानमन्त्रीको कार्यालयले एक विज्ञप्ति जारी गर्दै गाजामा युद्धविराम सुरु भएको घोषणा गरेको छ ।

युद्धविराम स्थानीय समयअनुसार आइतबार बिहान ११ः१५ बजे बाट सुरु भएको छ ।

इजरायललाई रिहा गरिने तीन बन्धकहरूको नाम पठाउन हमासले प्राविधिक कारण ढिलाइ भएको बताएपछि युद्धविराम निर्धारित समयभन्दा तीन घण्टा ढिला सुरु भएको हो ।

पूर्वसहमतिअनुसार आइतबार बिहान ८ः३० बजेबाट युद्धविराम सुरु हुने भनिएको थियो । तर, हमासले रिहा गर्ने तीन बन्धकको नाम पठाउन ढिलाइ गरेपछि युद्धविराम तीन घण्टा ढिला गरी सुरु भएको हो ।

ढिला गरिएको तीन घण्टाको समयमा इजरायलले गरेका आक्रमणमा परी गाजामा १३ प्यालेस्टिनको मृत्यु ३० जना घाइते भएका थिए ।

हमासले आइतबार विहान रिहा गर्ने तीनजनाको नाम इजरायललाई पठाएपछि गाजामा युद्धविराम सुरु भएको हो । युद्धविराम सम्झौताअनुसार रिहा गर्ने बन्धकको नाम उनीहरूलाई रिहा गर्नु २४ घण्टाअघि सार्वजनिक गर्नुपर्ने हुन्छ ।

हमासले ७ अक्टोबर २०२३ मा दक्षिण इजरायलमा आक्रमण गरेपछि हमास र इजरायलबीच युद्ध सुरु भएको थियो । हमासले उक्त दिन इजरायलबाट नेपाली युवा विपीन जोशीसहित २५१ जनालाई बन्धक बनाएर लगेका थिए ।

हमासले ७ अक्टोबर २०२३ मा इजरायलमा आक्रमण गर्दा १० नेपाली युवासहित एक हजार २०० जना मारिएका थिए । त्यसपछि इजरायलले गाजामा गरेको जवाफी आक्रमणमा ५० हजारभन्दा बढीको मृत्यु भइसकेको छ ।

यसैबीच इजरायल र हमासबीच युद्धबन्धी छोड्ने तथा युद्धविराम गर्ने सहमति बनेको थियो । कतार, इजिप्ट र अमेरिकाको पहलमा इजरायल र हमासबीच आइतबारबाट युद्धविराम सुरु भएको हो ।