काठमाडौं । इजरायली प्रधानमन्त्री बेन्जामिन नेतान्याहूले यदि दोस्रो चरणको युद्धविराम वार्ता सफल नभएमा इजरायल हमासविरुद्ध युद्ध पुनः सुरु गर्न तयार रहेको बताएका छन् ।

गाजा युद्धविराम र बन्धक रिहाइ सम्झौता आजदेखि लागु हुनुअघि टेलिभिजनमा सम्बोधन गर्दै बेन्जामिन नेतान्याहूले युद्धविराम ‘अस्थायी’ भएको र इजरायलले गाजामा फेरि आक्रमण गर्ने अधिकार सुरक्षित राखेको बताए ।

नेतान्याहूले यसका लागि डोनाल्ड ट्रम्पको पनि समर्थन रहेको दाबी गरेका छन् ।

हमास नेता याह्या सिनवारको हत्याको स्मरण गर्दै उनले पछिल्लो १५ महिनामा इजरायली सेनाको सफलताको बारेमा बताएका थिए ।
आफूहरूले मध्यपूर्वलाई परिवर्तन गरेको उनले बताए । उनले दाबी गरे, “हमास अब पूर्ण रूपमा एक्लो छ ।”

बेन्जामिन नेतान्याहूले पहिले नै भनेका छन्– हमासद्वारा रिहा गरिने बन्धकहरूको सूची प्राप्त नगरेसम्म इजरायलले सम्झौता लागु गर्दैन ।

नेतान्याहूले भने, “इजरायलले सम्झौताको उल्लंघन सहन गर्दैन ।” हमासले रिहा गर्ने ३३ बन्धकहरूको सूची इजरायली मिडियाले पहिले नै जारी गरिसकेको छ, तर अधिकारीहरूले यसको पुष्टि गरेका छैनन् ।

इजरायली अधिकारीहरूले आइतबार रिहा गरिने तीन बन्धकहरूको नाम अझै प्राप्त नभएको बताएका छन् ।

यसैबीच, हमासले बुधबार युद्धविराम सम्झौताको घोषणा भएदेखि इजरायली हवाई आक्रमणमा १२० जनाको मृत्यु भएको बताएको छ । 

युद्धविरामको सम्झौता अनुसार आइतबार तीनजना महिला बन्धक रिहा हुनेछन् । यसको बदलमा इजरायलले ३० जना प्यालेस्टिनी कैदी रिहा गर्नेछ ।

इजरायल र हमासबीच भएको यो युद्धविरामको सम्झौता तीन चरणमा लागु हुनेछ । पहिलो चरणमा हमासले महिला, बालबालिका र ५० वर्षभन्दा माथिका बन्धक रिहा गर्ने बताएको छ । (बीबीसीबाट)