काठमाडौं । वैदेशिक रोजगारीमा अमेरिका र रोमानिया पठाइदिने भन्दै रकम ठगी गरेको आरोपमा प्रहरीले दुईजनालाई पक्राउ गरेको छ । पक्राउ पर्नेमा सुनसरीको धरान उपमहानगरपालिका–१९ की ५५ वर्षीया चन्द्रकला रदाखु राई र महोत्तरीको सोनाम गाउँपालिका–२ की ५४ वर्षीया सरिताकुमारी यादव छन् । 

चन्द्रकलाले अमेरिका पठाइदिने भन्दै सातजनाबाट ४२ लाख रुपैयाँ संकलन गरेकी थिइन् । सरिताले रोमानिया पठाइदिने भन्दै एकजनाबाट ६ लाख ३० हजार रुपैयाँ लिएकी थिइन् । त्यसपछि उनीहरू सम्पर्कविहीन भएका थिए ।

पीडितको उजुरीको आधारमा चन्द्रकलालाई काठमाडौंको बौद्धबाट गएको बिहीबार पक्राउ गरिएको हो । सरितालाई ललितपुरबाट शुक्रबार (हिजो) पक्राउ गरिएको काठमाडौं उपत्यका अपराध अनुसन्धान कार्यालयले जनाएको छ ।

चन्द्रकलालाई आवश्यक अनुसन्धान र कारबाहीका निम्ति जिल्ला प्रहरी परिसर काठमाडौंमा पठाइएको छ । सरितालाई वैदेशिक रोजगार विभागमा पठाइएको उक्त कार्यालयका सूचना अधिकारी एवं एसपी काजीकुमार आचार्यले जानकारी दिए ।