काठमाडौं । विभागीय डर्बीमा त्रिभुनव आर्मी क्लबविरुद्ध २८ रनको जित निकाल्दै नेपाल पुलिस क्लब जय ट्रफी पुरुष इलाइट कप–२०२५ को च्याम्पियन बनेको छ । 

बिहीबार पर्साको वीरगन्जस्थित नारायणी क्रिकेट मैदानमा सम्पन्न फाइनलको अन्तिम दिन पुलिसबाट पाएको १०३ रनको लक्ष्य पछ्याउने क्रममा आर्मीले सबै विकेट गुमाएर ७४ रनमात्र बनाउन सक्यो । 

खेलको पहिलो इनिङ पुलिसले १३३ रनमा इनिङ समाप्तिको घोषणा गरेको थियो । पहिलो इनिङमा जवाफी ब्याटिङमा उत्रिएको आर्मीले १७० रन बनाउँदै पुलिसविरुद्ध ३७ रनको अग्रता बनाएको थियो । 

दोस्रो इनिङ पुलिसले १३९ रन बनाएपछि आर्मीले जितका निम्ति १०३ रनको लक्ष्य पाएको थियो । तर, दोस्रो इनिङमा पुलिसबाट सागर ढकाल र ललित नारायण राजवंशी चम्किएपछि आर्मी ७४ रनमै समेटिएको हो ।

दोस्रो इनिङमा आर्मीका ओपनर इम्रान सेखबाहेक, अन्य ब्याटरको प्रदर्शन उल्लेखनीय रहन सकेन । इमरानले सर्वाधिक २८ रन बनाए । कप्तान विनोद भण्डारी र सोमपाल कामीले समान ११ रन थप्दा अन्य ब्याटर भने दोहोरो अंकसम्म पुग्न सकेनन् ।

आर्मीलाई सस्तैमा समेट्न पुलिसका सागर ढकालले ६ विकेट लिए । सागरले १४.२ ओभरमाख एक मेडन फ्याँक्दै ३५ रन खर्चिए । यस्तै, ललितले चार विकेट लिए । १५ ओभर बलिङ गरेका ललितले दुई मेडन फ्याँक्दै ३९ रन खर्चिए ।

दोस्रो इनिङमा पुलिसका ओपनर कुशल भुर्तेलले सर्वाधिक ४५ रन बनाएका थिए । दिलीप नाथले ३४ रन जोड्दा राशिद खानले १८ र अमित श्रेष्ठले १३ रन थपे ।

दोस्रो इनिङमा बलिङतर्फ आर्मीका साहब आलम र बसिर अहमेदले समान पाँच विकेट लिएका थिए । साहब आलमले २५ ओभर बलिङ गर्दा चार मेडन फ्याँक्दै ७५ रन खर्चिएका थिए । यस्तै, बसिरले २२.१ ओभरमा ६ मेडन फ्याँक्दै ४९ रन खर्चिएका थिए ।