काठमाडौं । प्रधानमन्त्री केपी शर्मा ओलीले हालै जारी भएको अध्यादेशले समृद्ध नेपाल र सुखी नेपालीको आकांक्षालाई छिटै पूरा गर्न दत्तचित्त भएको सन्देश दिएको बताएका छन् ।

बुधबार सिंहदबारमा आयोजित पत्रकार सम्मेलनमा उनले अत्यन्त जरुरी भएका २९ वटा कानुन संशोधन गरेर मन्त्रिपरिषद्ले सिफारिस गरिएको र राष्ट्रपतिले जारी गरेको बताए ।

“अहिलेको सरकार जनतालाई सेवा प्रवाह गर्नेदेखि लिएर सुशासनका पक्षलाई सुदृढ गतिशील प्रभावकारी बनाउने । सुशासनका सबै पक्षमा ध्यान दिने । विकासका कामलाई अघि बढाउने र समृद्ध नेपाल, सुखी नेपालको आकांक्षा छिटो पूरा गर्न दत्तचित्त छ भन्ने सन्देश दिएको छ,” उनले भने ।

उनले भूमिसम्बन्धी अध्यादेश राष्ट्रपतिले जारी नगर्नुलाई अध्यादेश रोकियो भन्ने शब्द नै नमिल्ने बताए । “एकपटक नपढीकन राष्ट्रपतिले जारी गनुपर्छ भन्ने छैन । उहाँले अध्ययन गर्नुहुन्छ । अध्ययन गर्न लगाउनुपर्छ । भूमिसम्बन्धी अध्यादेश रोकियो भन्ने शब्द मिलेन अपव्याख्या हो,” ओलीले भने ।

उनले कांग्रेसका सभापति शेरबहादुर देउवाको नक्कली हस्ताक्षर गरेर सत्य तोडमोड गर्ने काम भएको बताए । उनले कांग्रेसको शीर्ष नेतृत्व, ब्युरोकेस्रीको शीर्ष र उद्यमी व्यवसायीसहितका कुरा सुनेर समस्या समाधानको ध्यान दिएर नै अध्यादेश जारी गर्नुपरेको सुनाए ।