काठमाडौं । प्रधानमन्त्री केपी शर्मा ओलीले स्वार्थका लागि जतिबेला पनि विरोध गर्नेहरूबाहेक अरूले विकास र सुशासन चाहेको बताएका छन् । नेपाल उद्योग वाणिज्य महासंघसहित निजी क्षेत्रका संघसंस्थासँगको भेटमा प्रधानमन्त्री ओलीले देश बनाउने भावना सबैमा रहेको बताए ।

उनले सरकार ढल्ने भनेर बजारमा हल्ला चलाइए पनि सत्ता गठबन्धनमा रहेका दलहरू भने नीति निर्माण सुधारका लागि प्रभावकारी ढंगले कदम चालिरहेको बताए । सुशासन र विकाससँग सम्बन्धित व्यवहारिक र अनुकूल नीति ल्याइए समृद्धि असम्भव नहुने ओलीको भनाइ छ ।

प्रधानमन्त्रीलाई भेट्न निजी क्षेत्रका प्रतिनिधि बुधबार बालुवाटार पुगेका थिए । भेटमा ओलीसहित उपप्रधानमन्त्री एवं अर्थमन्त्री विष्णु पौडेल, गृहमन्त्री रमेश लेखकसहित अन्य मन्त्रीको उपस्थिति थियो ।

निजी क्षेत्रका प्रतिनिधिहरूले कोभिड–१९ पछि संकुचित भएको अर्थतन्त्रलाई उकास्न अहिले जारी भएका अध्यादेश प्रभावकारी हुने बताएका थिए । उनहरूले आवश्यक नियमावली र कार्यविधि पनि छिट्टै ल्याउन माग गरे ।

सरकारको सिफारिसमा राष्ट्रपतिले पुस २९ गते चार अध्यादेश जारी गरेका थिए । भूमिसम्बन्धी अध्यादेश आउन जारी हुन बाँकी छ ।