काठमाडौं । नुवाकोटका घरजग्गा व्यवसायी विक्रम लामामाथि आक्रमणका ‘योजनाकार’मध्येका दुई अभियुक्त बेलायत पुगेको खुलेको छ । धरानकी लक्ष्मी राई र धादिङका रमेश सिलवाल बेलायत पुगेको प्रहरी अनुसन्धानका क्रममा खुलेको हो । उनीहरू दुवैजनालाई फरार सूचीमा राखेर सोमबार काठमाडौं जिल्ला अदालतमा मुद्दा दर्ता गरिएको छ ।

उनीहरूकै योजनामा विक्रममाथि गएको कात्तिक ११ गते लाजिम्पाटस्थित उनकै कार्यालयअगाडिको इनोभा अस्पतालको पार्किङमा अन्धाधुन्ध रड प्रहार गरिएको प्रहरीले जनाएको छ । विक्रममाथि आक्रमणलगत्तै उनीहरू बेलायत उडेको खुलेको हो ।

लक्ष्मीसित नेपाल र बेलायत दुवै देशको पासपोर्ट भएका कारण सजिलै भागेको प्रहरीको अनुमान छ । उनकै योजनामा रमेश समेत बेलायत पुगेका हुन् । उनीहरू बेलायतमा सँगै रहेको प्रहरीको दाबी छ ।

अनुसन्धानमा खटिएका एक प्रहरी अधिकारीका अनुसार, लक्ष्मीविरुद्ध केन्द्रीय अनुसन्धान ब्युरो (सीआईबी)मा किर्ते र राहदानी कसुरमा उजुरी परेको छ । लक्ष्मी विवादित महिला हुन् ।

लक्ष्मी आक्रमणमा परेका विक्रमका दाइ दिपेशकी पूर्वपत्नी हुन् । उनकै योजनामा विक्रममाथि आक्रमण गरिएको प्रहरीको निष्कर्ष छ ।

विक्रममाथि ज्यान मार्ने उद्देश्यले आक्रमण गर्ने समूहविरुद्ध प्रहरीले संगठित अपराध मुद्दामा अनुसन्धान गरेको थियो । तर, जिल्ला सरकारी वकिल कार्यालयले संगठित अपराध हटाएर ज्यान मार्ने मुद्दा मात्र दर्ता गराएको छ ।

प्रहरीले घटनामा योजनाकारका रूपमा पक्राउ गरेर अनुसन्धान गरी मुद्दा चलाउनुपर्ने राय दिएका टीका भण्डारी र पदम राईलाई भने उन्मुक्ति दिइएको छ । भण्डारी गण्डकी प्रदेशसभाका तत्कालीन सांसद एवं पूर्वमन्त्री राजीव गुरुङ (दीपक मनाङे)का सहयोगी हुन् ।

विक्रममाथि आक्रमणमा भण्डारी र राईको पनि संलग्नता देखिएपछि जिल्ला प्रहरी परिसर काठमाडौंको टोलीले पक्राउ गरेर अनुसन्धान गरेको थियो । तर, उनीहरूले सरकारी वकिल कार्यालयबाट नै उन्मुक्ति पाएका छन् । विक्रममाथि आक्रमण गर्न उनीहरू योजनाबद्ध रूपमा लागेको खुलेको प्रहरीले जनाएको छ ।

विक्रममाथि आक्रमण गर्ने र योजनाकार सातजनाविरुद्ध ज्यान मार्ने उद्योगमा मुद्दा दर्ता गरिएको छ । मुद्दा दर्ता गरिएका मध्ये हाल गोरखाका २८ वर्षीय निश्चल सुनार, गोरखाकै सिजन अधिकारी र नुवाकोटका मार्सल भनिने शैलेन्द्र तामाङ मात्र थुनामा छन् । भण्डारी र राई छुटिसकेका छन् ।

लक्ष्मी र रमेशबाहेक आक्रमण गर्ने नुवाकोटका ४० वर्षीय अजय लामा र गोरखाका दीपक बरामु फरार छन् । उनीहरू भारत भागेको प्रहरीको आंशका छ । सरकारी वकिल कार्यालयले अभियुक्तहरूलाई १० वर्ष जेल सजायको माग गरेको छ ।