काठमाडौं । चलचित्र ‘ताण्डवम्’ र ‘डोरी’को पोस्टर सार्वजनिक भएको छ । मंगलबार एकै दिन निर्माणपक्षले चलचित्रको पोस्टर सार्वजनिक गरेका हुन् । 

‘ताण्डवम्’लाई जुनिम गहतराजको निर्देशन गरेका हुन् । ‘डोरी’लाई अरुण लामाले निर्देशन गरेका छन् । 

‘ताण्डवम्’को पोस्टर रिलिजसहित प्रदर्शन मिति घोषणा गरिएको छ । यो चलचित्र फागुन ९ गतेबाट प्रदर्शनमा आउनेछ  । 

सार्वजनिक पोस्टरमा सिनेमाका मुख्य कलाकारहरु क्यारेक्टर लुक्समा प्रस्तुत छन् । पोस्टरमा पुष्कर गुरुङ, प्रेम सुब्बा, सरिना मगर, अंकित खड्का, अनोज पाण्डे र जुनिम गहतराज प्रस्तुत छन् । यो सिनेमाबाट कलरिस्ट जुनिमले निर्देशनमा डेब्यु गरेका हुन् । कमल कार्की र गोपाल कटुवालको पनि सिनेमामा अभिनय रहेको छ । 

एक नवविवाहित जोडी जो आफ्नो पहिलो सन्तानको स्वागतको तयारी गरिरहँदा उनीहरूको जीवनमा घट्ने अकल्पनीय घटनाले निम्त्याउने उतारचढावको कथालाई पारिवारिक तथा एक्सन थ्रिलर जनरामा प्रस्तुत गरिएको छ । 

चलचित्र ‘डोरी’ चैत १५ मा प्रदर्शन हुँदै छ । पोस्टरले चलचित्रको कथावस्तु र भावनात्मक गहिराइको झल्को दिने प्रयास गरेको छ ।

पोस्टरले कथामा समावेश हुने संघर्ष, रहस्य र गहन भावनालाई संकेत गरेको छ । । पोस्टरमा चलचित्रका कलाकार वीरेन्द्र सिंह कुशवाहाको क्रोधित अनुहार देखिन्छ । 

‘डोरी’को लेखन तथा निर्देशन अरुण लामाले गरेका हुन् । यसमा अनुभवी र नव–प्रवेशी कलाकारहरूको अभिनय छ । प्रवीण खतिवडा, शिशिर बाङ्देल, प्रकाश घिमिरे, अरुण लामा, अञ्जना बराइली, वीरेन्द्र सिंह कुशवाहा, राज पौडेल, कविता आले, राज थापा, नूतनलगायतको अभिनय रहेको छ ।