काठमाडौं । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङदेनले वर्तमान सरकार सर्वसत्तावादतर्फ उन्मुख रहेको टिप्पणी गरेका छन् । पृथ्वीनारायण शाहको ३०३औँ जन्मजयन्ती तथा राष्ट्रिय एकता दिवसका अवसरमा शनिबार काठमाडौंमा चियापान कार्यक्रम आयोजना गर्दै उनले नियमित रूपमा बोलाउनुपर्ने संसद् नबोलाएर अध्यादेश ल्याइएकामा असन्तुष्टि जनाए ।

देशलाई अध्यादेशको बाटोतर्फ लैजानुले सरकारको नियत स्पष्ट भएको उनले बताए । सरकारले बहुदलीय व्यवस्था र प्रजातन्त्र समेत मास्न खोजेको आरोप लगाउँदै उनले सशक्त प्रतिवाद गर्ने चेतावनी दिए ।

“यो सरकार सर्वसत्तावादतर्फ उन्मुख भएको छ । नियमित रूपमा बोलाउनुपर्ने संसद् नबोलाएर देश अध्यादेशको बाटोमा लैजानु भनेको यो सरकारको नियत के हो भन्ने कुरा यसैबाट प्रस्ट हुन्छ,” उनले भने, “यो सरकार प्रजातन्त्र, बहुदलीय व्यवस्था समेत मास्न चाहन्छ, यसको हामीले सशक्त प्रतिवाद गर्छौँ ।”

उनले राष्ट्रिय एकता दिवसका अवसरमा सरकारले सार्वजनिक बिदा दिनु उपलब्धिपूर्ण रहेको बताए । अर्को वर्ष सरकार आफैँले दिवस मनाउनुपर्ने उनले सुझाव दिए ।

चियापान कार्यक्रममा प्रधानमन्त्री केपी शर्मा ओली, राष्ट्रियसभाका अध्यक्ष नारायणप्रसाद दाहाल, सरकारका मन्त्रीहरू, विभिन्न दलका नेता–कार्यकता, शुभेच्छुकको उपस्थिति थियो । हिमालयन टेली भ्वाइस