काठमाडौं । संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले नेपाल वायुसेवा निगम दिनप्रतिदिन कमजोर हुँदै गएको बताएका छन् । मंगलबार प्रतिनिधिसभाअन्तर्गतको अन्तर्राष्ट्रिय सम्बन्ध तथा पर्यटन समिति बैठकमा बोल्दै मन्त्री पाण्डेले यस्तो बताएका हुन् ।

उनले नेपालको एक मात्रै राष्ट्रिय ध्वजावाहक नेपाल वायुसेवा निगम भए पनि राम्रो हवाई उडानमा क्षमता देखाउन नसकेको भन्दै असन्तुष्टि जनाए । निगमले भएका वाइडबडी र न्यारोबडी समेत सञ्चालन गर्न नसक्नु असक्षमता भएको संकेत गरे । मन्त्री पाण्डेले राष्ट्रिय ध्वजावाहकले नेपालको हवाई उडानलाई विस्तार र  हवाई टिकट सर्वसुलभ (सस्तो) बनाउनुपर्ने भूमिकामा समेत हस्तक्षेप गर्न नसकेको उल्लेख गरे ।

उनले हवाई भाडा नियन्त्रण र नियमन समेत नेपाल वायुसेवा निगमले गर्न नसकेको बताए । सरकारले पटक–पटक नेपाल एयरलाइन्ससँग निगमलाई बलियो बनाउने विषयमा छलफल गरेको उल्लेख गरे । निगममा रहेका जहाज खरिद गर्दादेखि विभिन्न विवादहरू र वायुसेवा निगम सञ्चालन गर्ने मोडालिटी र टिकट बिक्री वितरणमा समेत पारदर्शिता देखाउनुपर्ने विषयको खोजीमा लागेको बताए ।

उनले भने, "नेपालको हवाई उडानलाई विस्तार र  हवाई टिकट सर्वसुलभ (सस्तो) गर्ने हो भने राष्ट्रिय ध्वजावाहक बलियो र सुदृढ हुनुपर्छ । राष्ट्रिय ध्वजावाहक बलियो भयो भने मात्रै आन्तरिक र अन्तर्राष्ट्रिय हवाई भाडालाई नियन्त्रण गर्ने अवस्था आउँछ । अन्तर्राष्ट्रिय उडानको हवाई भाडा पनि धेरै बढ्न नदिने र हवाई भाडा नियन्त्रण र सन्तुलनामा राख्ने अवस्था नेपाल एयरलाइन्सले गर्न सक्दो रहेछ । त्यसको लागि के गर्न सकिन्छ भनेर पटक–पटक नेपाल एयरलाइन्ससँग छलफल भएको छ ।"

उनले पछिल्लो पटक मन्त्रालयले वायुसेवा निगमलाई सुधारको कार्ययोजना प्रस्तुत गर्न एक महिनाको समय दिएको बताए । उनले सुधारको योजना हेरेर निगमको नेतृत्वले सुधार प्रस्तुत गर्न समेत भनिएको उल्लेख गरे ।