काठमाडौं । प्रधानमन्त्रीसमेत रहेका नेकपा (एमाले)का अध्यक्ष केपी शर्मा ओलीले नयाँ सरकारले राजनीतिक स्थायित्वको सन्देश दिएको दाबी गरेका छन् ।

आइतबार केन्द्रीय कमिट‍ी बैठकमा प्रस्तुत गरिएको राजनीतिक प्रतिवेदनमा ओलीले आफू नेतृत्वमा बनेको सरकारले महत्त्वपूर्ण काम, उपलब्धि र नीतिगत सुधारका काम गरेको दाबी गरेका छन् ।

"प्रधानमन्त्रीले शपथ ग्रहण गरेकै दिन (असार ३१ गते) मन्त्रिपरिषद्लाई पूर्णता दिएर हामीले सत्ता सहयात्रीहरूबीच रहेको बलियो विश्वास, समझदारी र जिम्मेवारीबोधलाई प्रदर्शित गरेका छौँ । दुई दल बिच भएको सात बुँदे सहमतिलाई प्रभावकारी कार्यान्वयन गर्न र दुई दलबीच दिगो विश्वासको वातावरण निर्माण गर्न प्रधानमन्त्रीका तर्फबाट उक्त सहमति औपचारिक रूपमा सदनमा प्रस्तुत गरिएको छ र त्यो अभिलिखित भएको छ," उनले भनेका छन् ।

उनले अगाडि लेखेका छन्, "दलहरूबीच सहमति हुने, तर त्यसको आफूखुसी व्याख्या गर्दै दाउपेच र निजी स्वार्थमा दुरुपयोग गर्ने गलत परम्परालाई तोड्ने र राजनीतिलाई पारस्परिक विश्वास, पारदर्शिता र इमानको जगमा सञ्चालन गर्ने सन्दर्भमा यो सांकेतिक तर महत्त्वपूर्ण पाइला हो ।"