काठमाडौं । नेकपाका महासचिव नेत्रविक्रम चन्द ‘विप्लव’ले आफ्नो पार्टीले एकपटक देशको नेतृत्व गर्न चाहेको बताएका छन् । शनिबार काठमाडौंमा आयोजित पार्टी ध्रुवीकरण कार्यक्रममा उनले जनताको सेवाका निम्ति नेकपाले एकपटक देशको नेतृत्व गर्न चाहेको बताएका हुन् ।

“एकचोटि यो देशको नेतृत्व नेकपाले गर्न चाहन्छ, हामी गर्न चाहन्छौँ,” उनले भने, “सुविधाको लागि होइन ।”

उनले मुलुकको विकास र नेपाललाई हेप्ने विदेशी शक्तिका विरुद्ध सशक्त भएर उभिने स्पष्ट दृष्टिकोण नेकपामा रहेको जिकिर गरे ।

क्रान्तिकारीबीच सुरु भएको ध्रुवीकरणको क्रम अब नरोकिने उनले बताए । देशको नेतृत्वमा पुग्ने गरी सबैबीच ध्रुवीकरण हुने उनले उल्लेख गरे ।

उनले समान विचारधाराबीच एकता र सहकार्य गर्दै देशलाई संकटबाट रूपान्तरणतर्फ लैजाने बताए ।

ठूला भनिएका दलहरूभित्रको ध्रुवीकरण पनि जनताले हेरिरहेको उनको भनाइ छ । तर, उनीहरूको क्रियाकलापले जनता सन्तुष्ट नरहेको विप्लवले धारणा व्यक्त गरे । 

कार्यक्रममा नेपाल कम्युनिस्ट पार्टी र क्रान्तिकारी कम्युनिस्ट पार्टी, विद्रोहीबीच एकता घोषणा गरिएको थियो । हिमालयन टेली भ्वाइस

भिडियो हेर्नोस्–