काठमाडौं । प्रधानमन्त्री केपी शर्मा ओलीले बालगायक सचिन परियारको निधनले आफू दुःखी भएको बताएका छन् । बिहीबार बालगायक परियारको उपचारका क्रममा निधन भएको थियो । 

सो खबरले आफू धेरै दुःखी भएको उल्लेख गर्दै प्रधानमन्त्रीले सामाजिक सञ्जालमा लेखेका छन्,‘‘एकजना प्रतिभाशाली बालकमाथि पारिवारिक बेमेल र सामाजिक सञ्जालको भाइरल प्रवृत्तिले असर पुर्‍याएको यस घटनाले सामाजिक सम्बन्धका संवेदनशील विषयमा सजग भएर मात्र प्रतिक्रिया दिनुपर्छ भन्ने सबैलाई पाठ सिकाएको छ ।’’ 

बालगायक सचिनलाई उनले श्रद्धाञ्जली पनि दिएका छन् । प्रधानमन्त्रीले लेखेको उक्त स्टाटसमा १५ घन्टामा झन्डै आठ हजारजनाले टिप्पणी गरेका छन् । उनीहरूमध्ये अधिकांशले परियारको निधनमा सरकार पनि जिम्मेवार रहेको आरोप लगाएका छन् । 

तिनैमध्येका एक सामाजिक सञ्जाल प्रयोगकर्ता रोशन श्रेष्ठ लेख्छन्,‘‘सचिनको अभिभावक र विगतदेखि यो देश चलाउने अभिभावक एउटै भए ! हार्दिक श्रद्धाञ्जली बाबु तिम्रो आत्माले शान्ति पाओस् ।’’   

अर्का प्रयोगकर्ता सरोज केसी लेख्छन्, ‘‘जीवित रहुन्जेल चिनिएन, चासो भएन, मरिसकेपछि फेसबुकमा श्रद्धमञ्जली अनि तारिफ ! यो प्रवृत्ति कहिले हट्छ प्रधानमन्त्रीज्यू ?’’ 

कतिपयले भने उनका जन्मदाता नै जिम्मेवार नहुँदा बालगायकले अल्पायुमा ज्यान गुुमाउनुपरेको उल्लेख गरेका छन् । मैनाली कल्याण लेख्छन्, ‘‘जन्मदाता नै कुलंगार भए र तिमीलाई प्रयोग मात्रै गरेर आफू मस्त हुनेको जमातको कारण तिम्रो ज्यानै गयो, हार्दिक श्रद्धाञ्जली सचिन भाइ ।