काठमाडौं । राष्ट्रिय महिला लिगको दोस्रो चरणमा वाग्मती युवा क्लबविरुद्ध २–० को जित निकालेपछि विभागीय टिम त्रिभुवन आर्मी क्लबका मुख्य प्रशिक्षक कृष्णसिंह ठगुन्नाले टोलीको लक्ष्य उपाधि रहेको बताएका छन् ।

बिहीबार सातदोबाटोस्थित एन्फा मुख्यालयमा भएको खेलमा आर्मीलाई जित दिलाउन दुवै गोल विमला चौधरीले गरेकी थिइन् । खेलपछि उनले आफ्नो टोलीले प्रशिक्षणबाहेक खेल समय नपाएकाले पहिलो खेल आशाअनुरुप हुन नसकेको जनाए ।

“हामीले विश्वकपमा पनि पहिलो खेलमा अर्जेन्टिनाले साउदीसँग हारेको देख्यौँ । हाम्रो पनि यो पहिलो खेल हो । खेल नभए पनि हामी विभागीय टिम भएकाले प्रशिक्षण नियमित हुन्छ । तर, प्रशिक्षणमात्रै भयो, गेम टाइम पाउन सकेनौँ,” प्रशिक्षक ठगुन्नाले भने, “प्रतियोगितामा हामीसँगै अरु दुई विभागीय टोली पनि बलिया छन् । तर, हाम्रो टिम प्रतियोगिताको दाबेदार हो । हाम्रो लक्ष्य उपाधि हो ।”

आर्मीले लिग चरणको पहिलो चरणमा दोस्रो स्थान सुनिश्चित गर्दै दोस्रो चरणको यात्रा तय गरेको हो ।

वाग्मती शीर्ष पाँचमा नपरे पनि दोस्रो चरणमा मौका पाउने टोली हो । यसअघि पहिलो चरणमा कोसी प्रदेशले शीर्ष पाँचमा स्थान पक्का गरेको थियो । तर, आर्थिक संकट देखाउँदै कोसीले नाम फिर्ता लिएपछि छैटौँ भएको वाग्मतीले अवसर पाएको हो ।

लिगको दोस्रो चरणमा पाँच टोली छनोट भएका छन् । यसअघि पहिलो चरणमा १० टोलीले प्रतिस्पर्धा गरेका थिए ।