काठमाडौं । पाहुना टिम पाकिस्तानविरुद्धको टेस्ट शृंखलाको पहिलो खेलमा घरेलु टोली दक्षिण अफ्रिका दुई विकेटले विजयी भएको छ ।
डिसेम्बर २६ देखि सुरु भएको टेस्टको पहिलो इनिङमा पाकिस्तानले २११ रन बनाएको थियो । पहिलो इनिङमा घरेलु टिम दक्षिण अफ्रिकाले ३०१ रन बनाउँदै ९० रनको अग्रता बनाएको थियो ।
दोस्रो इनिङमा पाकिस्तानले सबै विकेट गुमाएर २३७ रनमात्र बनाउँदा पाहुना टिमले १४७ रनको मात्रै अग्रता बनाएको थियो । १४८ रनको सामान्य लक्ष्यसहित मैदान उत्रिएको दक्षिण अफ्रिकाले आठ विकेट गुमाएर १५० रन बनाउँदै शृंखलाको पहिलो खेल दुई विकेटले जितेको हो ।
पहिलो टेस्टमा दुवै टिमका कुनै पनि ब्याटर शतकसम्म पुग्न सकेनन् । पहिलो खेलको पहिलो इनिङमा पाकिस्तानका कम्रन घुलमले ५४ रन बनाएका थिए ।
दक्षिण अफ्रिकाका डेन पिटरसनले पाँच र कोर्बिन बोस्कले चार विकेट लिएका थिए ।
दोस्रो इनिङमा पाकिस्तानका साउद सकिलले ८४ र बाबर आजमले ५० रन बनाए ।
दक्षिण अफ्रिकाका मार्को जान्सेनले ६ विकेट लिए । १४ ओभर बलिङ गरेका जान्सेनले तीन मेडन फ्याक्दै ५२ रन खर्चिए ।
ब्याटिङमा दक्षिण अफ्रिकाबाट पहिलो इनिङमा ओपनर आइदेन मार्करमले ८९ र कोर्बिन बोस्कले ८१ रन बनाएका थिए ।
पाकिस्तानका खुरम सहजाद र नसिम साहले समान तीन विकेट लिएका थिए ।
दोस्रो इनिङमा दक्षिण अफ्रिकाका कप्तान टेम्बा बवुमाले सर्वाधिक ४० रन बनाए ।
पाकिस्तानका मोहम्मद अब्बासले ६ विकेट लिए पनि टिमको हार टार्न सकेनन् ।
शृंखलाको दोस्रो तथा अन्तिम टेस्ट जनवरी ३ देखि सुरु हुनेछ । यसअघि यी दुई टिमबीच भएको दुई खेलको ट्वान्टी–२० शृंखलामा पाकिस्तानले ‘क्लिन स्विप’ गरेको थियो ।
यस्तै, तीन खेलको एकदिवसीय शृंखलामा पनि पाकिस्तानले ‘ह्वाइट वास’ गरेको थियो ।
-1743849429.jpg)
-1742355287.jpg)
