काठमाडौं । प्रहरी महानिरीक्षक (आईजीपी) वसन्तबहादुर कुवँरले आठजना प्रहरी नायव महानिरीक्षक (डीआईजी)लाई एक हप्ताअघि दर्ज्यानी चिह्न लगाइदिए । गृहमन्त्रीस्तरको निर्णयबाट प्रहरी वरिष्ठ उपरीक्षक (एसएसपी)बाट बढुवा भएका डीआईजीलाई उनल‍े प्रहरी प्रधान कार्यालयमा एक कार्यक्रमका बीच मंसिर १७ गते दर्ज्यानी चिह्न लगाइदिएका थिए ।

तर, डीआईजीको दर्ज्यानी चिह्न लगाएका उनीहरूको पदस्थापन अझै हुन सकेको छैन । एसएसपीबाट ध्रुवराज राउत, भोलाबहादुर रावल, गणेश चन्द, सिद्धिविक्रम शाह, सुशिलसिंह राठौर, उमाप्रसाद चतुरबेदी, हिमालकुमार श्रेष्ठ र डम्बरबहादुर बिक डीआईजीमा बढुवा भएका थिए ।

तर, उनीहरूको पदस्थापन नहुँदा अझै एसएसपीले कमान्ड गर्ने पुरानै कार्यालयमा थन्किएका छन् । प्रहरी इतिहासमै डीआईजीको दर्ज्यानी चिह्न लगाएर पनि पदस्थापन हुन यति धेरै समय लागेको यो नै पहिलोपटक हो ।

एसएसपी दर्जाभन्दा माथिको बढुवा र सरुवाको अधिकार गृहमन्त्रालयसँग हुन्छ । बढुवा भएका डीआईजीहरू कसलाई कहाँ पदस्थापन गर्ने भन्नेबारे तीव्र दबाब आएपछि पदस्थापन नै रोकिएको केही बढुवा भएका डीआईजीहरू नै बताउँछन् ।

गृह मन्त्रालयले बढुवा भएका केही डीआईजीलाई प्रदेश प्रहरी कार्यालयको जिम्मेवारी दिने तयारी गरेको छ । सोही कारण पदस्थापन रोकिएको हो । प्रहरी स्रोतका अनुसार, लुम्बिनी प्रदेश, कोसी र सुदूरश्चिम प्रदेश प्रहरी प्रमुखमा हाल बढुवा भएका डीआईजीलाई पठाउने तयारी गरेको छ ।

तीनवटै प्रदेशका प्रहरी प्रमुखको सरुवा अवधिसमेत एक वर्ष पुग्दै छ । उनीहरूले गएको पुसदेखि प्रदेश प्रहरी प्रमुखको कमान्ड सम्हालेका थिए । हाल लुम्बिनीमा डीआईजी कुवेर कठायत, कोसीमा चन्द्रकुवेर खापुङ र सुदूरपश्चिम रविन्द्र केसी प्रमुख छन् ।