सिड्नी, अष्ट्रेलिया । उच्च शिक्षा अध्ययन गर्न अष्ट्रेलिया आउने नेपाली विद्यार्थीहरूमध्ये बसाइँ, पढाइ र खर्चबारे पहिल्यै जानकार भएका कमै मात्र भेटिन्छन् ।  विदेश भन्नेबित्तिक्कै खुट्टा उचाली हाल्ने हाम्रो नयाँ पुस्ता, त्यसपछिका समस्या र चुनौतीबारे भने अनभिज्ञ देखिन्छन् ।

पढाइ खर्च, बसाइँ खर्च र कामका लागि जोहो अनि परिवारको आशा, सबैतिर ध्यान पुर्‍याउनुपर्छ ।  तर विदेश अध्ययन गर्न आएका नेपाली विद्यार्थीहरू आर्थिक व्यवस्थापन गर्न नसक्दा समस्यामा पर्ने गर्छन् र डिप्रेशन अनि अनेकन मानसिक रोगको सिकार भएको पाइन्छ । 

त्यतिमात्र होइन, पछिल्ला वर्ष कम्तिमा पनि ६ जना नेपाली विद्यार्थीहरूले यस्तै समस्याका कारण आत्महत्याको बाटो रोजेको पीडादायक तथ्यांक पनि भेटिन्छन् । अष्ट्रेलिया भौतिक सम्पन्नता र आर्थिक विकासले नेपाली विद्यार्थीलाई आकर्षित गर्छ । 

त्यसैले त अष्ट्रेलियामा मात्र ७० हजारको हाराहारीमा नेपाली विद्यार्थी उच्च अध्ययनमा छन् । यतिखेरको नेपाली युवा पुस्ताको ‘ट्रेन्ड’ बनेको छ, अध्ययनका लागि विदेश जाने विषय ।

अभिभावकको चाहना विदेश जाओस्, भविष्य बनाओस् भन्ने छ । त्यही चाहनाका कारण विद्यार्थीका रूपमा विदेशिने क्रम निरन्तर छ । तर विदेशको वास्तविकता नेपालबाट देखिनेभन्दा बिल्कुल फरक र अलग छ ।

अष्ट्रेलिया अध्ययनका लागि आउने विद्यार्थीले आउनुअघि नै केही विषयमा स्पष्ट हुनु जरुरी हुन्छ ।  क्षेत्रफलका हिसाबले नेपालभन्दा ५४ गुणा ठूलो भए पनि त्यहाँको जनसंख्या नेपालको भन्दा कम छ । अष्ट्रेलियामा विश्वका करिब एक सय साठी मुलुकका मानिस बस्छन् ।

समग्रमा ज्ञान, सीप र व्यवसायिकताको अभिवृद्धिका लागि अष्ट्रेलिया उत्कृष्ट गन्तव्यका रूपमा चिनिन्छ । ठ्याक्कै उल्टो भए पनि जाडो र गर्मीका हिसाबले नेपाल र अष्ट्रेलियाका हावापानी केही हदसम्म मिल्ने गर्छ । नेपाली विद्यार्थीले आफ्नै देश पुगे जस्तो अनुभव गर्न सक्ने वातावरण अष्ट्रेलियामा छ । 

यहाँका सबै सहरहरूमा नेपाली भेटिन्छन् भने खानपिनमा पनि नेपालीपन जताततै पाइन्छ । अन्य देशको तुलनामा अष्ट्रेलियामा स्थापित हुन सजिलो छ । त्यहीकारण नेपाली विद्यार्थीका लागि अष्ट्रेलिया उत्कृष्ट गन्तव्यका रूपमा पनि चिनिएको हो । 

अष्ट्रेलियाको आम्दानीको महत्वपूर्ण श्रोत पनि हो शैक्षिक उद्योग । १५.६ विलियन अष्ट्रेलियन डलर अन्तर्राष्ट्रिय शैक्षिक व्यापारबाट कमाउने गर्छ ।

अष्ट्रेलियामा कलेज अनुसार, शिक्षण शुल्क पनि फरक फरक हुन्छ ।  कलेजको ब्रान्ड, गुणस्तर जस्ता कुराले शुल्क फरक पर्न जान्छ ।  यहाँ साना कोठे डिप्लोमा कलेजदेखि विश्वविख्यात विश्वविद्यालय पनि छन् ।  अष्ट्रेलिया पढ्न १२ लाखदेखि ३५ लाखसम्म वार्षिक खर्च हुन्छ । 

हस्पिटालिटी, नर्सिङ, आईटी, इन्जिनियर, विजनेश, पब्लिक हेल्थ, प्रोजेक्ट म्यानेजमेन्टजस्ता विषय अष्ट्रेलियामा राम्रो मानिन्छ । नेपाली विद्यार्थीहरू विदेश जाने कुरा मात्र प्राथमिकतामा राख्छन् ।  त्यहाँ गएपछिको पढाई, बसाइँ र कामलाई कसरी व्यवस्थापन गर्ने भन्ने विषयमा गम्भीर भएको पाइँदैन ।

त्यहाँ गएर कहाँ बस्ने, के गर्ने र पैसाको व्यवस्थापन कसरी गर्ने भन्ने विषय महत्वपूर्ण हुन्छ ।  छ महिना वा एक वर्षको शिक्षण शुल्क तिरेर आएका बाँकी समयको शुल्क कसरी तिर्ने भन्नेसम्मका विषयमा विद्यार्थी अनभिज्ञ पाइन्छन् । 

पढ्न गएका विद्यार्थी काम र दाम कमाउने विषयमा बढी केन्द्रित भएका कारण स्थापित हुन नसकेका कैयन उदाहरण छन् । 

पढाई छाडेर काम र दामका पछाडि हिँड्न थालेपछि कलेजको निष्कासन पर्छन् । त्यसले कैयन नेपाली विद्यार्थीहरू समस्यामा परेका देखिन्छन् । नेपालबाट आएका कम उमेरका युवाहरू हप्ताको हजार, १५ सय कमाउन थालेपछि पढाइभन्दा फेसनतिर ढल्किन पुग्दा समस्या निम्तिने गरेको यहाँ बसोबास गरिरहेका पुराना नेपाली व्यवसायी बताउँछन् ।

जुवा, ड्रिंक्स र ड्रग्सले पनि कैयन नेपाली युवाहरू अष्ट्रेलियामा समस्याग्रस्त भएको पाइन्छ । 

टोलैपिच्छे खोलिएका जुवाघर र खुला समाजले पनि कैयन विद्यार्थीहरूलाई नराम्ररी गिजोलेको छ । पारिवारिक वातावरणमा बसेका कैयन युवायुवती यहाँ आउनेबित्तिकै स्वतन्त्र र स्वच्छन्द रूपमा बहकिने हुँदा जुवा र रक्सीको लतमा नराम्ररी फसेका देखिन्छन् । 

त्यसले न उनीहरू उद्देश्य पूरा गर्न सक्छन् न त नेपाल नै फिर्न सक्छन् नै । अष्ट्रेलिया आउँदै गर्दा विद्यार्थीले यहाँको अवस्था र ब्यवस्था बुझेर दीर्घकालीन तयारी र योजना बनाएमा मात्र उनीहरू सफल हुने देखिन्छ । अभिभावकले पनि छोराछोरीले विदेश पठाउँदै गर्दा के गरिरहेको छ, कसरी बसेको छ र के काम गर्छ भन्ने विषयमा चनाखो हुन जरुरी देखिन्छ । 

एक सेमिस्टरको पैसा तिरेर पठाएको छोराछोरीलाई दोस्रो सेमेस्टरदेखि कसरी तिर्छन् वा कमाइ छ कि छैन भन्ने सोच अभिभावकले राख्नु जरुरी छ । विदेश जाने बित्तिकै डलर कमाउँछ र पठाउँछ भन्ने यहाँको अवस्था नबुझ्ने सोचका कारण पनि विद्यार्थीहरू डिप्रेशनमा गएको पाइन्छ ।

अन्य मुलुकको तुलनामा अष्ट्रेलियामा कम छात्रवृत्ति पाइन्छ ।  त्यसैले त्यहाँ अध्ययन गर्न आर्थिक रूपमा खर्चिलो हुन्छ र यसमा विद्यार्थी चनाखो हुनु जरुरी देखिन्छ । 

कुरोको चुरो भनेको तपाईँ अष्ट्रेलिया उच्च अध्ययनका लागि आउँदै हुनुहुन्छ भने यहाँको अवस्था र व्यवस्थाका बारेमा विस्तृत अध्ययनको जरुरी देखिन्छ । विदेशको रहर र पहेँलो डलरको सोचमा अष्ट्रेलियामा कैयन नेपाली विद्यार्थीहरू मानसिक रोगी बन्दैछन् ।