काठमाडौं । नेपाल प्रिमियर लिग (एनपीएल)मा कर्णाली याक्सविरुद्ध लक्ष्य पछ्याइरहेको काठमाडौं गुर्खाजले पहिलो पावर प्लेमा मध्यम सुरुआत गरेको छ । 

बुधबार कीर्तिपुरस्थित त्रिवि क्रिकेट मैदानमा जारी खेलमा कर्णालीले दिएको १५० रनको लक्ष्य पछ्याइरहेको काठमाडौंले ६ ओभरको समाप्तिमा दुई विकेट गुमाएर ३७ रन बनाएको छ । काठमाडौंबाट हाल क्रिजमा रहेका माइकल लेभिट १९ र भीम सार्की आठ रनमा खेलिरहेका छन् । 

त्यसअघि टस हारेर ब्याटिङमा आएको कर्णालीले निर्धारित २० ओभरमा पाँच विकेट गुमाएर १४९ रनको योगफल खडा गरेको थियो । प्रतियोगितामा दुवै टिमको यो दोस्रो खेल हो । दुवै टिम आज पहिलो जितको खोजीमा छन् । 

यसअघि पहिलो खेलमा कर्णाली याक्स जनकपुर बोल्ट्ससँग आठ विकेटले पराजित भएको थियो । काठमाडौं गुर्खाजलाई चितवन राइनोजले पाँच विकेटले पराजित गरेको थियो ।