काठमाडौं । ओपनर ब्याटर मार्टिन गप्टिलले अर्धशतक बनाएपछि नेपाल प्रिमियर लिग (एनपीएल)को उद्घाटन खेलमा विराटनगर किंग्स्ले जनकपुर बोल्ट्सविरुद्ध १२८ रनको लक्ष्य प्रस्तुत गरेको छ ।

शनिबार कीर्तिपुरस्थित त्रिवि क्रिकेट मैदानमा टस हारेर ब्याटिङमा आएको विराटनगरले १९ ओभरमा सबै विकेट गुमाएर १२७ रनको योगफल खडा गरेको हो ।

विराटनगरका ओपनर गप्टिलले ५५ रन बनाए । एनपीएलमा अर्धशतक बनाउने पहिलो ब्याटर बनेका गप्टिलले ४३ बलमा सात चौका र एक छक्का प्रहार गरे । अकिब इल्सासले १५ रन थपे । 

यसबाहेक विराटनगरका कुनै पनि ब्याटरले दोहोरो अंकमा रन जोड्न सकेनन् । विराटनगरको खातामा निकोलस किर्टोनले नौ, बसिर अहमेद, कप्तान सन्दीप लामिछाने र अनिल खरेलले समान सात रन बनाए । क्रिस सोलले चार र प्रतिश जिसीले दुई, राजेश पुलामी एक रनमै पभेलियन फर्किए । विराटनगरका जितेन्द्र मुखिया गोल्डेन डक भए ।

विराटनगरलाई सस्तैमा समेट्न जनकपुरका ललितनारायण राजवंशीले तीन विकेट लिए । चार ओभर बलिङ गरेका ललितले २८ रन खर्चिए । किशोर महतो र हर्ष थाकेरले समान दुई विकेट लिए । मोहमद मोहसिन र बेन माइकको नाममा एक विकेट रह्यो ।

ललितले पहिलो विकेट लिएका थिए । उनले दोस्रो ओभरको पहिलो बलमा लोकेश बमलाई बोल्ड गरे । दोस्रो विकेट मोहसिनले लिए । उनले ८.२ ओभरमा अकिब इल्यासलाई एलबीडब्ल्यूको धरापमा पारे ।

जनकपुरले तेस्रो विकेट १२औँ ओभरको अन्तिम बलमा लिएको थियो । थाकेरले निकालेस किर्टोनलाई बोल्ड गरे । चौथो विकेट पनि थाकेरले नै लिए । उनले १४औँ ओभरको अन्तिम बलमा मार्टिन गप्टिललाई अनिल साहबाट क्याच गराए । 

विराटनगरले पाँचौँ विकेटका रूपमा राजेश पुलामीलाई १५.३ ओभरमा गुमाएको थियो । पुलामीलाई जनकपुरका लहिरु मिलान्थाले रनआउट गरे ।

छैटौँ विकेट ललितले लिए । ललितले प्रतिश जिसीलाई १६.१ ओभरमा बोल्ड गरे । सातौँ विकेट पनि ललितले नै लिए । ललितले सोही ओभरको तेस्रो बलमा बसिर अहमेदलाई अनिल साहबाट क्याच गराए ।

आठौँ विकेट विराटनगरले १७.३ ओभरमा गुमाएको थियो । विराटनगरका कप्तान सन्दीप लामिछानेलाई किशोर महतोले अरनिको यादवबाट क्याच गराए । सोही ओभरको चौथो बलमा किशोरले जितेन्द्र मुखियालाई बोल्ड गरे ।

विराटनगरले अन्तिम विकेट १९औँ ओभरको अन्तिम बलमा गुमाएको हो । विराटनगरका क्रिस सोललाई जनकपुरका बेन माइकले मोहमद मोहसिनबाट क्याच गराए । 

आजको खेलमा जनकपुर अनिल साह र विराटनगर सन्दीप लामिछानेको कप्तानीमा मैदान उत्रिएको छ ।