काठमाडौं । महालक्ष्मी विकास बैंकले सामाजिक उत्तरदायित्वअन्तर्गत विविध कार्यक्रम सम्पन्न गरेको छ । बैंकले शिक्षा, स्वास्थ्य, दैवी प्रकोप व्यवस्थापन, वातावरण संरक्षण, सांस्कृतिक प्रवर्धन, पूर्वाधार निर्माण/सुधार, दिगो विकास लक्ष्य, मानव सेवा तथा परोपकार कार्यजस्ता क्षेत्रहरूमा सामाजिक उत्तरदायित्व अन्तर्गतका कार्यक्रम गर्दै आएको छ ।

बैंकका कार्यालयमा रहेका डिस्पोजेबल कागजहरू राउन्ड टेबल नेपाल र महालक्ष्मी विकास बैंकको प्रत्यक्ष निगरानीमा तोकिएका कागज उत्पादक कम्पनीलाई पुनः प्रशोधनका लागि दिने र सोमार्फत प्राप्त रकम गरिब तथा असहाय विधार्थीहरूको शिक्षामा पहुँच विस्तार गर्दै शैक्षिक विकासको लागि खर्च गर्ने गरी राउन्ड टेबल नेपालसँग समझदारी गरेको छ ।

यसबाट बैंकले गर्दै आएको संस्थागत सामाजिक उत्तरदायित्व कार्य तथा राउन्ड टेबल नेपालले गर्दै आएको 'बालबालिकालाई शिक्षित गरौँ' भन्ने परियोजनामा थप टेवा पुग्ने विश्वास लिइएको छ ।

संस्थागत सामाजिक उत्तरदायित्वअन्तर्गत नै तीनकुने टोल सुधार समिति, काठमाडौंलाई फोहोर व्यवस्थापनमा सहयोग पुर्‍याउन डस्टबिन वितरण गरेको छ । ४०० भन्दा बढी घरधुरी रहेको टोलमा स्वच्छता र हरियाली प्रवर्धन गर्ने उद्देश्यका साथ ५० वटा डस्टबिन वितरण गरिएको बैंकले जनाएको छ ।

संस्थागत सामाजिक उत्तरदायित्व कार्यलाई निरन्तरतास्वरूप ललितपुर रत्न तथा आभूषण संघ र रोटरी क्लब अफ पाटन हेरिटेजसँगको सहकार्यमा सांस्कृतिक गहना र सम्बन्धित कलाकृतिहरूको प्रदर्शनका साथै विभिन्न रत्नादी भएको परम्परागत आभूषणहरूको प्रदर्शन गर्न आयोजित 'पाटन हेरिटेज रनवे' आयोजना गर्न आर्थिक सहयोग गरेको छ ।

त्यसैगरी, दैनिक कामकाजलाई सहजरूपमा सञ्चालन गर्न आवश्यक पर्ने कम्प्युटर, मनिटर, कम्प्युटर टेबल, कुर्ची जस्ता कार्यालय सामग्री खरिद गर्न श्री शिव मन्दिर, बसडिलवा, सिदार्थनगर, रूपन्देहीलाई बैंकले आर्थिक सहयोग गरेको छ । यसपछि मन्दिर व्यवस्थापनलाई कार्यालय व्यवस्थापन र पत्राचार गर्न सहज हुने बैंकको विश्वास छ ।