सिड्नी । विद्यार्थीलाई विश्वका विभिन्न देशहरूमा शिक्षाको लागि सहजीकरण गरिरहेको एक्सपर्ट एजुकेसन एन्ड भिसा सर्भिसेसको टोली अन्टार्कटीका महादेश पुगेको छ । त्यहाँ पुगेर वातावरण संरक्षणप्रति चासो देखाएको छ । 

एक्सपर्टका सात निर्देशकले अन्टार्कटीकामा बैठक बस्दै  वातावरण संरक्षणमा सबैको चासो आजको आवश्यकता रहेको निष्कर्ष निकालेका हुन् । एक्सपर्ट एजुकेसन एन्ड भिसा सर्भिसेसअन्तर्गतको एक्सपर्ट फाउन्डेसनको विशेष बैठक समेत उनीहरूले अन्टार्कटीकामा गरेका थिए । जसमा विश्वव्यापी रूपमा बढ्दो जलवायु परिवर्तन र नेपाल, हिमालय र जलवायु परिवर्तनबारे छलफल गरिएको एक्सपर्ट नेपालका निर्देशक खेम संग्रौलाले जानकारी गराए ।

एक्सपर्टले सामाजिक सेवा गर्न सञ्चालनमा ल्याएको फाउन्डेसनले नेपाललगायत विभिन्न मुलुकमा प्राकृतिक विपद् र महामारीका बेला सहयोग पु¥याउँदै आएको छ । सोही सन्दर्भमा अन्टार्कटीकामा जलवायु परिवर्तनसम्बन्धी छलफल गर्दै प्रतिबद्धता जनाएको सहभागी भुवन पाण्डेले बताए । 

एक्सपर्टको टोलीमा भुवन पाण्डे, सरोजकुमार शर्मा, बसन्तराज पोख्रेल, रुपक बर्तौला, टीएन अर्याल, खेम संग्रौला र प्रसन्न दाहाल अन्टार्कटिका पुगेका हुन् । उनीहरूसहित १३ नेपाली टिममा छन् । टोली नोभेम्बर २६ सम्म त्यहाँ रहनेछ । 

एक्सपर्टले हाल विश्वभरी ६० भन्दा बढी शाखामार्फत् नेपाली विद्यार्थीहरूलाई अष्ट्रेलिया, अमेरिका, क्यानडा, बेलायतसहित १६ मुलुकमा पढ्न जान सहजीकरण गरिरहेको छ ।