काठमाडौं । भारतीय समाचार एजेन्सी एएनआईले आर्टिफिसियल इन्टेलिजेन्स (एआई) कम्पनी ओपन एआईविरुद्ध मुद्दा दायर गरेको छ । ओपन एआईले च्याटबट च्याटजीपीटीलाई परीक्षण दिन आफ्ना प्रकाशित सामग्रीहरू अनुमतिबिना प्रयोग गरेको भन्दै एएनआईले दिल्ली अदालतमा मुद्दा दायर गरेको हो ।

विश्वभर ओपन एआईविरुद्ध मुद्दा हाल्ने सञ्चारमाध्यम न्यूर्योक टाइम्स, सिकागो ट्रिब्युनलगायतमा पछिल्लो एएनआई बनेको हो । मुद्दाको पहिलो सुनुवाइमा मंगलबार दिल्ली उच्च अदालतले ओपनएआईलाई एएनआईको आरोपविरद्ध विस्तृत प्रतिक्रिया दिन आदेश दिएको छ ।

यसरी प्रकाशित सामग्री एआई प्लेटफर्मले प्रयोग गरिरहेको वैधानिकताबारे पनि निर्णय गर्नुपर्ने एएनआईको भनाइ छ । कतिपय मनगढन्ते समाचारमा समेत च्याटजीपीटीले एएनआईले लेखेको भन्दै गलत भाष्य निर्माण गरेको समाचार एजेन्सीको आरोप छ ।

ओपनएआईका वकिलले एएनआईलाई गत सेप्टेम्बरदेखि उक्त वेबसाइट आन्तरिकरुपमा ब्लक गरिएको र एआई मोडललाई परीक्षण गर्न रोक लगाइएको भनेर प्रतिक्रिया पठाएको अदालतमा पेस गरिएका कागजातमा उल्लेख छ ।

एएनआईले भने यसले प्रकाशन गरेका सामग्री स्थायीरुपमा च्याटजीपीटीको मेमोरीमा भण्डारण भएको र त्यसलाई डिलिट गर्ने कुनै प्रोग्रामिङ नभएको दाबी गरेको छ ।

ओपन एआईले आफ्ना मोडलहरूलाई सार्वजनिकरुपमा उपलब्ध सामग्रीका आधारमा प्रशिक्षण गरिएको बताउँदै आएको छ । आफ्नो च्याटबटको सेवा बिक्री गरिरहेको ओपन एआईले विभिन्न सञ्चार माध्यमका डिजिटल प्लेटफर्ममा प्रकाशित एवं इन्टरनेटमा उपलब्ध सामग्री अनुमतिबिना प्रयोग गरेपछि मुद्दा खेप्न थालेको हो ।

यो मुद्दाको दोस्रो सुनुवाइ जनवरी २८ का लागि तोकिएको छ । रोयटर्स