काठमाडौं । ओखलढुंगाको जिल्ला समन्वय समिति (जिसस) प्रमुखमा नेपाली कांग्रेसका नेता टेकराज भट्टराई निर्विरोध निर्वाचित भएका छन् । मंसिर १६ गते हुने चुनावका लागि आइतबार उमेदवारी दर्ताको तालिका थियो । तर, ओखलढुंगा जिसस प्रमुखमा टेकराजको मात्र उमेदवारी पर्‍यो । नेकपा (एमाले)ले विज्ञप्ति नै निकालेर टेकराजलाई समर्थन गर्‍यो । अन्य पार्टीले उमेदवारी नदिएर मौन समर्थन गरे । निर्वाचनको १४ दिन अगावै टेकराज निर्विरोध भए ।

साझा पदका लागि जुटेको सर्वपक्षीय समर्थनले आफू अनुगृहीत रहेको बताए । “यो पद निर्वाचित भएकै क्षणदेखि साझा पद हो । आखिर सबैसँग समन्वयमै काम गर्नुपर्ने हुँदा सहकार्य आवश्यक हुन्छ,” टेकराजले बाह्रखरीसँग भने, “एमालेले विज्ञप्ति नै जारी गरेर समर्थन जनायो । अन्य पार्टीहरूले उमेदवारी नदिएर समर्थन जनाए । म खुसी त छु नै, उहाँहरूप्रति अनुगृहीत पनि छु ।”

२०२८ सालमा संस्कृति माविको युनियनमा सचिव भएर राजनीति सुरु गरेका टेकराज त्यसको २१ वर्षपछि ०४९ सालमा जिल्ला विकास समिति सदस्य निर्वाचित भएका थिए । त्यसपछिका ३२ वर्षपछि उनले पाएको यो पहिलो सार्वजनिक लाभको पद हो ।

“अब राजनीतिबाट लाभका पदमा जान पाउँदिनँ भनेर करिब माया मारेको अवस्था थियो,” टेकराज भन्छन्, “नसोचेको र अपेक्षा नगरेको जिम्मेवारी प्राप्त भयो । खुसी नहुने त कुरै भएन ।”

०७९ सालको स्थानीय तहको निर्वाचनपछि टेकराजका मित्र डिल्लिराज खनाल जिल्ला समन्वय समितिको प्रमुख थिए । मस्तिष्कको क्यान्सरबाट पीडित खनाल 'मृत्यु शय्या'बाट फर्किए । तर, कार्यकाल पूरा गर्न नभ्याउँदै डिल्लिराजको निधन भयो । करिब डेढ वर्ष रिक्त रहेको पद अब टेकराजले मंसिर १७ गतेदेखि कार्यभार सम्हाल्दै छन् ।

कांगेसभित्र एउटा पुरानो भनाइ छ– देशभरको राजनीति एक खालको हुन्छ । ओखलढुंगा र तनहुँ कांग्रेसको राजनीति अर्कै खालको ।

नेता धेरै भएर अस्वस्थ प्रतिस्पर्धा हुने भएकाले देशभर चलेका वैचारिक राजनीतिक लाइन र गुटहरूको प्रभाव यी जिल्लामा भिन्नै हुन्छ । तर, जब केन्द्रीय महाधिवेशन प्रतिनिधिहरू पुग्छन्, केन्द्रमा उनीहरूका आआफ्ना गुट हुन्छन् ।

यस्तो प्रभाव रहेको ओखलढुंगामा उमेदवार चयन जहिले फलामे चिउरा चपाउनुसरह हुन्छ । संघीय संसद्का लागि ०७९ सालमा पनि उमेदवाहरू अन्य पार्टीले जिल्लामा उमेदवारी दर्ता सुरु गर्दासम्म बालुवाटारमै टिकट कुरिरहेका थिए । ढिला गरी उमेदवार चयन भएपछि प्रतिनिधिसभामा रामहरि खतिवडा र प्रदेशसभामा प्रदीपकुमार सुनुवार टिकट लिएर निर्वाचन अधिकृतलाई कुर्न आग्रह गर्दै जिल्ला पुगेका थिए । प्रदेशसभाको अर्को सिट भने कांग्रेसले गठबन्धनको दल माअ‍ोवादी केन्द्रलाई दिएको थियो ।

त्यस्तो खिचातनीको राजनीति हुने ओखलढुंगामा यसपटक टेकराज सर्वसम्मत उमेदवार बने । उनकै पालामा जुरेको कांग्रेसभित्रको संयोगलाई अन्य दलले पनि साथ दिएर टेकरलाई थप प्रफुल्लित बनाइदिए ।

टेकराजको विगत 

०२८ सालमा संस्कृत माविको युनियनमा साहित्य सचिव भएका टेकराज त्यसयता लगातार नेपाली कांग्रेससँग जोडिएर राजनीतिमा सक्रिय छन् । कक्षा ५ सम्म ओखलढुंगामा अध्ययन गरेपछि थप अध्ययनका लागि काठमाडौं आएका टेकराज संस्कृत माविमा भर्ना भए । त्यही अध्ययनका क्रममा उनी युनियनको राजनीतिमा जोडिए । युनियनको त्यही आबद्धता उनको जीवनको बाटो बन्यो । 

त्यसबेलाको प्रतिबन्धित कांग्रेससँग निकट गराउने आधार बनेको उनको आबद्धता भने ०३३ सालपछि कांग्रेसको विद्यार्थी संगठन नेपाल विद्यार्थी संघबाट भयो । क्याम्पस पढ्न धरान गएका टेकराज पिण्डेश्वर संस्कृत क्याम्पसमा भर्ना भए । त्यही उनी नेपाल विद्यार्थी संघमा आबद्धमात्र भएनन्, नेता बनेर उदाए । त्यही क्रममा सुनसरी जिल्लाको सचिव भएर काम गरेका उनी ०३७ सालमा स्नातक सक्दैगर्दा सुनसरीबाटै केन्द्रीय प्रतिनिधि चुनिए ।

अहिलेका कांग्रेस नेता विमलेन्द्र निधिलाई अध्यक्ष बनाएर फर्किएपछि टेकराजले नेविसंघ राजनीतिमा त्यही पूर्णविराम लगाए ।

०३९ साल देखि ०४३ सालसम्म उनी शिक्षणमा सक्रिय भए । तर, उनले छाडेको नेविसंघको आबद्धताले उनलाई छोडेन । पञ्चायतका नजरमा उनी ‘अराष्ट्रिय तत्व’मै गनिए । पढाउने वातावरण नभएपछि उनी शिक्षण पेसालाई पनि बिट मारेर कांग्रेसकै राजनीतिमा होमिए । ०४५ सालदेखि उनी पूर्णरूपमा कांग्रेसको राजनीतिमा सक्रिय भए ।

बीपी कोइरालाबाट प्रभावित भएर राजनीतिमा लागेका उनी पहिलोपटक ०४९ सालमा जिल्ला विकास समितिको सदस्य भए । उनी कुनै आयोग, समिति वा नियुक्तिमा परेन् । कांग्रेस निकट नेपाल किसासन संघको सभापति भएर जिल्लामा काम गरेका उनले निष्ठाको राजनीति गर्ने पात्रको पहिचान बनाएका छन् ।

जिल्ला समन्वय समिति प्रमुख भएपछि उनले सबैसँग समन्वय गरेर अगाडि बढ्ने बताए । “अहिले प्रप्त गर्दै गरेको यो पद अवसर र जिम्मेवारी दुवै हो,” उनले भने, “जीवनको उत्तरार्धमा पाएको यो जिम्मेवारीलाई सकेको न्याय गर्ने छु । सबै पार्टीबाट निर्वाचित जनप्रतिनिधिहरूबाट समन्वयको अपेक्षा गर्दै सहकार्यका लागि आह्वान पनि गर्दछु ।”