काठमाडौं । प्रधानमन्त्री केपी शर्मा ओलीले पूर्वसभामुख दमननाथ ढुंगानाको पार्थिव शरीरमा राष्ट्रिय झन्डा ओढाएर सम्मान प्रकट गरेका छन् । सोमबार ज्ञानेश्वरस्थित सानोगौचरन पुगेर उनले ढुंगानाप्रति श्रद्धाञ्जली व्यक्त गरेका हुन् ।

त्यसअघि, नेपाली कांग्रेसका सभापति एवं पूर्वप्रधानमन्त्री शेरबहादुर देउवाले उनको पार्थिव शरीरमा पार्टीको झन्डा ओढाएर सम्मान प्रकट गरेका थिए ।

ढुंगानाप्रति श्रद्धाञ्जली व्यक्त गर्न प्रधानन्यायाधीश प्रकाशमान सिंह राउत, प्रथम राष्ट्रपति डा. रामवरण यादव, उपप्रधानमन्त्री, पूर्वउपराष्ट्रपति नन्दबहादुर पुन पनि सानोगौचरण पुगेका थिए ।

यस्तै, नेकपा (माओवादी केन्द्र)का अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’, नेपाल समाजवादी पार्टी (नयाँ शक्ति)का अध्यक्ष एवं पूर्वप्रधानमन्त्री डा. बाबुराम भट्टराई, नेकपा (एकीकृत समाजवादी)का अध्यक्ष एवं पूर्वप्रधानमन्त्री माधवकुमार नेपाल, नेकपा (एकीकृत समाजवादी)का सम्मानित नेता एवं पूर्वप्रधानमन्त्री झलनाथ खनाल, मन्त्रीहरू, पूर्वप्रधानन्यायाधीश सुशीला कार्की, उपसभामुख इन्दिरा राना, सांसदहरू विभिन्न राजनीतिक दलका नेता–कार्यकर्ता, कर्मचारी, कानुन व्यवसायी, सर्वसाधारण पनि सानोगौचरन पुगेका छन् ।

काठमाडौंको पशुपति आर्यघाटमा आजै ढुंगानाको अन्त्येष्टि गरिनेछ । सरकारले राष्ट्रिय सम्मानका साथ उनको अन्त्येष्टि गर्ने निर्णय गरेको छ । उनको निधनको शोकमा आज एक दिन देशभर सार्वजनिक बिदा दिने निर्णय समेत गरिएको छ ।

८३ वर्षको उमेरमा उपचारका क्रममा आइतबार (हिजो) दिउँसो बानेश्वरस्थित फ्रन्टलाइन अस्पतालमा उनको निधन भएको हो । वरिष्ठ अधिवक्ता समेत रहेका ढुंगाना कलेजोसँग सम्बन्धित समस्याका कारण केही समयदेखि उपचाररत थिए । उनका श्रीमती, दुई छोरा र एक छोरी छन् ।

थप तस्बिर हेर्नोस्–