काठमाडौं । आन्तरिक राजस्व कार्यालय हेटौँडाका प्रमुख कर अधिकृत युक्त सुवेदीले पेसा तथा व्यवसाय गर्ने हरेक व्यक्ति करको दायरामा आउनुपर्ने बताएका छन् । शनिबार राजस्व कार्यालय हेटौँडाले आयोजना गरेको कार्यक्रममा उनले हरेक कारोबारमा बिल बिजक अनिवार्य जारी गर्न र नियमित रूपमा कर दाखिला गर्न व्यवसायीलाई आग्रह गरेका हुन् ।

व्यवसायीलाई कारोबारको लेखा प्रतिवेदन पारदर्शी बनाएर असल करदाता बन्न पनि उनले आग्रह गरे । “लगानी बढ्दा उद्योग र व्यापार बढ्ने हुँदा रोजगारी बढ्छ । रोजगारी सिर्जनाले नागरिकको जीवनस्तरमा सुधार आउँछ,” उनले भने, “नागरिकको क्रयशक्ति बढेर वस्तु तथा सेवाको खपत बढ्यो भने राजस्वमा वृद्धि हुन्छ । राजस्वमा वृद्धि हुँदा पूर्वाधार निर्माणमा सरकारी लगानी बढ्ने र लगानीले फेरि राजस्व बढाउने गर्छ ।”

उच्च आर्थिक वृद्धिका निम्ति आन्तरिक तथा बाह्य लगानी बढ्नुपर्ने उनले उल्लेख गरे ।