काठमाडौं । यूईएफए नेसन्स लिगमा इंग्ल्यान्डले घरेलु टोली ग्रीसविरुद्ध ३–० को सहज जित निकालेको छ ।

बिहीबार एथेन्स ओलम्पिक रंगशालामा पाहुना टिम इंग्ल्यान्डलाई जित दिलाउन ओली वाट्किन्स र कर्टिस जोन्सले समान एक गोल गरे । इंग्ल्यान्डले अर्को एक गोल आत्मघाती उपहार प्राप्त गरेको थियो ।

खेलको सातौँ मिनेटमा वाट्किन्सको गोलमार्फत इंल्यान्डले अग्रता लिएको थियो । ७७औँ मिनेटमा ओडिसेयस भ्लाकोडिमोसबाट आत्मघाती गोल हुँदा इंग्ल्यान्डले अग्रता दोब्बर बनाएको थियो । निर्धारित समय सकिन सात मिनेट बाँकी रहँदा जोन्सले गोल गर्दै टिमलाई सहज जित दिलाए ।

जितसँगै पाँच खेलबाट १२ अंक जोडेको इंग्ल्यान्ड लिग ‘बी’को समूह–२ मा शीर्ष स्थानमा उक्लिएको छ । प्रतियोगितामा पहिलो हार व्यहोरेको ग्रीस समान खेलबाट १२ अंकसहित तालिकाको दोस्रो स्थानमा छ ।

यही समूहको अर्को खेलमा आयरल्यान्डले फिनल्यान्डविरुद्ध १–० को कठिन जित निकाल्यो ।

बिहीबार राति नै भएका अन्य खेलमा नर्वेले स्लोभेनियालाई ४–१, अस्ट्रियाले कजाखस्तानलाई २–०, नर्थ म्यासेडोनियाले लात्भिया र फिरोय आइल्यान्डले अर्मेनियालाई समान १–० ले पराजित गरेका छन् ।