जाग्रेब । एक नेपालीसहित विदेशी कामदारमाथि आक्रमण गरेको आरोपमा चारजनालाई पक्राउ गरिएको क्रोएसियाको प्रहरीले जनाएको छ ।

क्रोएसियाले व्यापक आप्रवासन र घट्दो जनसंख्याको सामना गरिरहेको छ । ३८ लाख जनसंख्या छ । युरोपियन युनियन (ईयू) सदस्य राष्ट्र क्रोएसियाले दीर्घकालीन श्रम अभावबाट पार पाउन संघर्ष गरिरहेको छ ।

परम्परागत रूपमा बाल्कन छिमेकीहरूबाट मौसमी कामदारमा निर्भर क्रोएसियाले एड्रियाटिक तटमा निर्माण र यसको प्रमुख पर्यटन क्षेत्रमा विशेष गरी दशौँ हजार रोजगारीका निम्ति नेपाल, भारत, फिलिपिन्स र अरू ठाउँका कामदारमा भरोसा गरिरहेको छ ।

तटीय सहर स्प्लिटमा खाना डेलिभरी गर्ने एक कामदारमाथि शारीरिक आक्रमण गरेको आशंकामा पक्राउ परेका चारैजनामाथि ‘घृणाजन्य अपराध’को आरोपमा अनुसन्धान भइरहेको प्रहरीले शनिबार जनाएको छ ।

शुक्रबार रातिको आक्रमणमा ४१ वर्षीय एक विदेशी नागरिक र एक आक्रमणकारी सामान्य घाइते भएका प्रहरीले जनाएको छ ।

उक्त आक्रमणलगत्तै स्प्लिटमा खाना डेलिभरी गर्ने विदेशी कामदारलाई लक्षित गरी अरू तीन घटना भएका थिए, जसमा एक नेपाली गम्भीर घाइते भएका थिए । घाइते हुनेमा अर्का एकजना भारतीय नागरिक थिए भने अरू दुईजनाको राष्ट्रियता खुलाइएको छैन । प्रहरीले तीनै आक्रमणका दोषीको खोजीकार्य जारी राखेको जनाएको छ ।

सन् २०२३ मा क्रोएसियाले ईयूबाहिरका करिब एक लाख २० हजार नागरिकलाई श्रम अनुमति प्रदान गरेको थियो । यो वर्ष यो आँकडा अझ बढी हुने बताइएको छ । सरकारले नोभेम्बरसम्म लगभग एक लाख ५० हजार ईयूभन्दा बाहिरका नागरिकका निम्ति वर्क परमिट जारी गरेको थियो ।

राजधानी जाग्रेबका प्रहरीले यो वर्षको सुरुमा विदेशी कामदार, विशेष गरी खाद्यान्न डेलिभरी गर्नेहरूमाथि आक्रमणको संख्या बढ्दै गएको बताएका थिए ।

प्रायजसो घटनामा आक्रमण जातीय नभई डकैतीजन्य थिए । तथापि, आप्रवासीलाई नियमित रूपमा अनलाइनमा सार्वजनिक गर्ने गरिएको छ भने भाषाको अवरोध र बाहिरी व्यक्तिप्रति नकारात्मक दृष्टिकोणले नयाँ श्रमशक्तिका निम्ति बाधा प्रस्तुत गरेको छ ।

क्रोएसियाको कुल जनसंख्याको ९० प्रतिशतभन्दा बढी क्रोएट्स समुदायले ओगटेको छ, जसमध्ये करिब ८० प्रतिशत रोमन क्याथोलिक छन् । रासस/एएफपी