गाजा । गाजामा शनिबार गरिएको इजरायली हमलामा १४ प्यालेस्टाइनीको मृत्यु भएको त्यहाँको नागरिक सुरक्षा एजेन्सीले जनाएको छ । एजेन्सीका अनुसार, मृत्यु हुनेमा अधिकांश महिला तथा बालबालिका छन् ।

खान युनिसको दक्षिणी क्षेत्रस्थित विस्थापित प्यालेस्टाइनीको निवासमा गरिएको हमलामा उनीहरूको मृत्यु भएको गाजाको नागरिक सुरक्षा एजेन्सीका प्रवक्ता महमुद बासलले बताए ।

प्यालेस्टाइनी मानवअधिकारवादी संस्था रेड क्रिसेन्टले आक्रमणमा घाइते भएका ११ जनालाई उपचारका निम्ति अस्पतालमा लगिएको पुष्टि गरेको छ ।

गाजाको अल–तुफाहजिल्ला स्थित हजारौँ विस्थापितको आश्रयस्थल फहद अल–सबाह स्कुलमा गरिएको इजरायली आक्रमणमा बालबालिकासहित पाँचको मृत्यु र करिब २२ जना घाइते भएका बासलले जनाएका छन् । उनले घाइतेहरूलाई अल–अहली अरब अस्पतालमा लगिएको बताए ।

यसैबीच, इजरायली सेनाले उत्तरी गाजाको जबालिया क्षेत्रमा दर्जनौँ आतंककारीको मृत्यु भएको जनाएको छ । रफाहमा धेरै लडाकुको मृत्यु भएको जनाएको छ ।

गाजाको स्वास्थ्य मन्त्रालयको तथ्यांकानुसार, इजरायलको सैन्य आक्रमणले अधिकांश नागरिकसहित कम्तीमा ४३ हजार ५०८ जनाको ज्यान लिइसकेको छ । रासस/एएफपी