काठमाडौं । प्रमुख प्रतिपक्ष दल नेकपा (माओवादी केन्द्र)ले वर्तमान सरकारको सय दिन भ्रष्टाचारीको संरक्षणमा बितेको आरोप लगाएको छ । यही कात्तिक १० गते काठमाडौंमा गर्न लागिएको खबरदारीसभाबारे जानकारी दिन बिहीबार आयोजित पत्रकार सम्मेलनमा यस्तो टिप्पणी गरिएको हो ।

“अपारदर्शी, अस्वाभाविक र रहस्यमय तरिकाले संवैधानिक मर्म, भावना र नैतिकताविपरीत बनेको दुईदलीय सरकारको सय दिन बितेको छ । सरकारको सय दिन भ्रष्टचारीको संरक्षण र सुशासनमाथि निरन्तर प्रहार गरेर बितेको छ,” पत्रकार सम्मेलनमा वितरित प्रवक्ता अग्निप्रसाद सापकोटाले जारी गरेको विज्ञप्तिमा उल्लेख छ ।

उक्त विज्ञप्ति माओवादी केन्द्रका वाग्मती प्रदेश अध्यक्ष सरल सहयात्रीले पढेर सुनाएका थिए ।

जनता र देशको अधिकतम हितमा केन्द्रित हुनुपर्ने समयमा बेलागाम बनेको सरकारलाई जनउत्तरदायी बनाउन खबरदारी गर्न लागिएको विज्ञप्तिमा उल्लेख छ । “राष्ट्रियता, लोकतन्त्र र जनजीविकाका सवाल झन्झन् गम्भीर र संवेदनशील भएका छन् । जनता र देशको अधिकतम हितमा केन्द्रित हुनुपर्ने समयमा बेलागाम बनेको सरकारलाई जनउत्तरदायी बनाउन प्रतिपक्षको हैसियतले खबरदारी गर्न कार्तिक १० गते खबरदारीसभा गर्ने निर्णय गरिएको छ,” विज्ञप्तिमा भनिएको छ ।

सरकारको उद्देश्य निहित स्वार्थ समूहको हित र प्रतिरक्षा गर्ने रहेको माओवादीको आरोप छ । “सरकारको तर्फबाट भ्रष्टाचारी जोगाउन र बिचौलियाका पक्षमा एकपछि अर्को निर्णय गर्दै जाने घटनाक्रमको निरन्तरताले सरकारको उद्देश्य जनतालाई प्रभावकारी सेवा प्रदान गर्ने नभई निहित स्वार्थ समूहको हित र प्रतिरक्षा गर्ने रहेको कुरा प्रस्ट हुन्छ,” विज्ञप्तिमा भनिएको छ ।

माओवादीले सरकार भ्रष्टाचारमा मुछिएका आफ्ना नेतालाई संरक्षण गर्ने तर विपक्षीलाई खोजीखोजी दण्डित गर्ने कार्यमा लागेको आरोप पनि लगाएको छ ।

सहकारी संस्थाको बचत रकम ठगी प्रकरणमा नाम जोडिएका नेपाली कांग्रेसका उपसभापति धनराज गुरुङ र सार्वजनिक लेखा समितिका सभापति एवं नेकपा (एमाले)का सांसद ऋषिकेश पोखरेललाई संरक्षण गरिएको पनि प्रवक्ता सापकोटाले आरोप लगाए ।