काठमाडौं । अमेरिकी पूर्वराष्ट्रपति तथा रिपब्लिकन पार्टीका तर्फबाट राष्ट्रपतिका उमेदवार डोनाल्ड ट्रम्पको चुनावी अभियानले बेलायतको लेबर पार्टीविरुद्ध संघीय निर्वाचन आयोग (एफईसी)मा उजुरी दिएको छ ।

उजुरीमा लेबर पार्टीसँग सम्बद्ध व्यक्तिहरू डेमोक्रेटिक पार्टीको तर्फबाट अमेरिकी राष्ट्रपतिको उमेदवार बनेकी कमला ह्यारिसको प्रचारका लागि अमेरिका आएको उल्लेख गरिएको छ ।

ह्यारिस–वाल्जको चुनावी अभियानलाई सहयोग गर्न लेबर पार्टीले अमेरिकी चुनावमा हस्तक्षेप गरेको आरोप उजुरीमा छ । यसलाई ट्रम्पको चुनावी अभियानले ‘स्पष्ट विदेशी हस्तक्षेप’ भनेको छ । 

कमला ह्यारिस अमेरिकाको वर्तमान उपराष्ट्रपति र डेमोक्रेटिक पार्टीबाट राष्ट्रपतिको उमेदवार हुन् ।

अमेरिकी राष्ट्रपतिको निर्वाचनमा प्रचारप्रसार गरिरहेका लेबर पार्टीका कार्यकर्ताहरूले आफ्नो व्यक्तिगत हैसियतमा यस्तो काम गरिरहेको बीबीसीले जनाएको छ ।

लेबर पार्टीले भने यी आरोपहरूका बारेमा हालसम्म कुनै आधिकारिक प्रतिक्रिया दिएको छैन । (बीबीसी)