काठमाडौं । हङकङमा हुने हङकङ क्रिकेट सिक्सेसमा नेपाली टिमको कप्तानी सन्दीप जोराले र प्रशिक्षण जिम्मेवारी पूर्वकप्तान ज्ञानेन्द्र मल्लले गर्ने भएका छन् ।

नेपाल क्रिकेट संघ (क्यान) मंगलबार प्रतियोगितामा सहभागी हुने सात खेलाडी र प्रशिक्षकको नाम सार्वजनिक गरेको हो । जसअनुसार, नेपाली टिममा सन्दीपसँगै लोकेश बम, नारायण जोशी, विवेक यादव, प्रतिश जीसी, दीपेन्द्र रावत र राशिद खान छन् ।

नोभेम्बर १ देखि ३ सम्म हङकङमा हुने प्रतियोगितामा नेपाल समूह ‘बी’मा छ । यस समूहमा नेपालसँगै इंग्ल्यान्ड र अस्ट्रेलिया छन् । प्रतियोगितामा कुल १२ टिमको सहभागिता रहने छ । जसलाई प्रत्येक समूहमा तीन टिम रहने गरी चार समूहमा विभाजन गरिएको छ । 

कस्तो प्रतियोगिता हो हङकङ सिक्सेस ? 

हङकङमा आयोजना हुने प्रतियोगिताको पहिलो संस्करण सन् १९९२ मा भएको थियो । प्रतियोगितामा एक टिमले पाँच ओभरको इनिङ खेल्ने छन् । जसमा टिमका रहेका सातमध्ये ६ खेलाडी मैदान उत्रिन्छन् । प्रत्येक टिमले आफ्नो पाँच ओभरको इनिङमा विकेटकिपरबाहेक पाँच फरक खेलाडीलाई एक ओभर बलिङ गर्न दिनुपर्ने छ । एक इनिङमा पाँच ओभरमात्र हुने हुँदा यस प्रतियोगिताका प्रत्येक खेलमा आक्रामक ब्याटिङको अपेक्षा रहन्छ ।

खेलका दौरान हुने वाइड र नो बलबाट विपक्षी टिमले दुई रन प्राप्त गर्ने छन् । यस्तै, पाँच ओभरको इनिङ सकिनु अगावै ब्याटिङ गर्ने टिमले पाँच विकेट गुमाए छैटौँ ब्याटरले एक्लै ब्याटिङ गर्न पाउने छन् । जसका लागि उक्त ब्याटरले एक जना रनरअप पाउने छ ।

कुनै टिमका ब्याटरले खेलका दौरान ३१ रन बनाएपछि रिटायर हुने नियम छ । तर, पछिका ब्याटर आउट वा रिटायर भएपछि भने उक्त ब्याटर पुनः मैदान प्रवेश गरि खेल्न पाउने छन् । प्रतियोगिताको फाइनल खेलमा भने एक ओभर आठ बलको हुने नियम छ ।