राजविराज । बडादसैँको अवसरमा सप्तरीको छिन्नमस्ता भगवती मन्दिरमा शुक्रबार पुष्पवृष्टि गरिएको छ । नेपाली सेनाको हेलिकोप्टरबाट छिन्नमस्ता गाउँपालिका–३, सखडास्थित उक्त मन्दिरमा पुष्पवृष्टि गरिएको गाउँपालिकाका अध्यक्ष विद्यानन्द चौधरीले जानकारी दिए ।

पहिलोपटक छिन्नमस्ता गाउँपालिकाको आग्रहमा नेपाली सेनाको हेलिकोप्टरमार्फत पुष्पवृष्टि गरिएको उनले बताए । “धार्मिक आस्था र मातृशक्तिप्रति श्रद्धा व्यक्त गर्दै, छिन्नमस्ताको अद्भुत शक्तिको सम्मानस्वरूप पहिलोपटक हामीले अष्टमीको दिने पुष्पवृष्टि गर्दा यहाँका भक्तजन र यस क्षेत्रका स्थानीयवासी खुसी भएका छन्,” अध्यक्ष चौधरीले भने ।

राजविराजदेखि १० किलोमिटर दक्षिणमा पर्ने छिन्नमस्ता गाउँपालिकास्थित ठूलोपोखरीको उत्तरी डिलमा अवस्थित छिन्नमस्ता मुलुकका प्रमुख ५१ शक्तिपीठमध्ये एक मानिन्छ । यो मन्दिरमा बडादसैँमा मेला समेत लाग्ने गरेको मन्दिरको पीठाधीश महानन्द ठाकुरले बताए । उनका अनुसार, यो मन्दिरमा भाकल पूरा भएपछि लड्डु र बोका चढाउने परम्परा छ ।

यस्तै, सप्तरीको हनुमाननगर कंकालिनी नगरपालिका–१, भारदहस्थित कंकालिनी मन्दिर समेतमा शुक्रबारै नेपाली सेनाको हेलिकोप्टरमार्फत पृष्पवृष्टि गरिएको छ । विगत दुई वर्षदेखि बडादसैँको महानवमीका दिन यहाँ हेलिकोप्टरमार्फत पृष्पवृष्टि गराउन थालिएको हो ।

कंकालिनी मन्दिरमा दसैँको नवमी तिथिका दिन राँगो बलि दिने चलन छ । हालसम्म ६२१ राँगा यहाँ बलि दिइएको मन्दिर विकास समितिले जनाएको छ । यहाँ पनि आज ठूलो मेला लागेको छ । रासस